Pavlodar ýnıversıtetiniń televıdenıesi Reseıde jeńimpaz atandy

PAVLODAR. 28 sáýir. S.Toraıǵyrov atyndaǵy Pavlodar oblystyq memlekettik ýnıversıtetiniń «Ýnıversıtet-TV» stýdenttik-telearnasy Reseıdiń Tom qalasynda ótken baıqaýda jeńimpaz atandy. Bul týraly ýnıversıtet baspasóz qyzmetiniń deregine silteme jasaǵan egemen.kz tilshisi habarlady. Ǵylymı-tanymdyq, aǵartýshylyq baǵdarlamalar men ýnıversıtet telebaǵdarlamalarynyń «Ýnıversıtet -TV» búkilreseılik festıvaline  pavlodarlyqtardan bólek, V.Shýhov atyndaǵy Belgorod memlekettik tehnologııalyq ýnıversıteti, Kemerov memlekettik ýnıversıteti, Tom polıtehnıkalyq ýnıversıteti, Ońtústik Oral memlekettik ýnıversıteti, F. Dostoevskıı atyndaǵy Omby ýnıversıteti, Tom basqarý jáne radıoelektronıka ýnıversıteti, Novosibir memlekettik tehnıkalyq ýnıversıteti, «Saha» ulttyq habar taratý kompanııasy, «Tom» QTRK, Saratov memlekettik zań akademııasy qatysyp, ózderi daıyndaǵan týyndylaryn kórsetti. Al S.Toraıǵyrov atyndaǵy ýnıversıtettiń televılenıesi baıqaý úshin arnaıy daıyndaǵan habar «Baǵdarlamanyń eń úzdik dızaıni» atalymy boıynsha jeńimpaz atandy. Stýdenttik telearna Reseıde Máshhúr Júsiptiń ómiri men shyǵarmashylyǵyna arnalǵan «Halyqqa daryǵan danalyq» atty tanymdyq derekti fılmin kórsetti. Ýnıversıtet medıa-ortalyǵynyń rejısseri Elena Dıachenko, oqý úrdisin aqparattandyrý bóliminiń jetekshisi Sapar Toqsanov, ınjener baǵdarlamashy Elena Baranovalar júldeli oryn alýǵa óz úlesterin qosty. Tom qalasynda sondaı-aq «Tanymdyq teledıdar: eldegi zııatkerlik potensıaldy saqtaý jáne damytý» atty ǵylymı-tájirıbelik semınar da ótti. Ǵylymı semınarǵa RF Bilim jáne ǵylym mınıstrligi, «Sibir ashyq ýnıversıteti» assosıasııasy, Tom qoǵamdyq palatasynyń ókilderi qatysty. Farıda Byqaı. Derekkóz: egemen.kz. Foto: www.inform.kz.