«Ápke, meniń telefonymdy eshkimge bergen joq pa edińiz? «Altyn ǵasyr» deı me, «Altyn kitap» deı me, bireýler habarlasyp, meni jaqsy ustaz retinde irikteýden óttińiz, sol kitapqa kirgizip, ustazdyǵym, otbasym týraly maqala shyǵarady eken. Biraq 100 myń tóle deıdi». Týysymnyń óńirdegi «úzdik júz ustazdyń biri» bolǵanyna qýanyp turǵany daýsynan seziledi. Alaıda bular alaıaqtar ekenin birden eskertip, eshkimge de baılanys nómirin bermegenimdi aıtqanmyn.
Endi osy jýyrda otandyq kosmetologııany damytyp júrgen kásipker qurbym Gúlshash Áýbákirqyzy ózin beıtanys bireýler qaıta-qaıta mazalap, medal berip, Qazaqstannyń úzdik júz adamy enetin ensıklopedııaǵa qosatynyn aıtyp, tipti oılanýǵa ýaqyt bergen. Bar bolǵany 350 myń teńge tólese, sol kitapta Asanáli Áshimov... sııaqty basqa da tanymal tulǵalarmen qatar turatyny týraly aıta ketýdi umytpapty.
Gúlshash: «Men ol kisiler sııaqty tulǵa emespin, ataq degen satylmaý kerek qoı» degen ýájben qutylǵandaı bolǵanymen, alaıaqtar isin dóńgeletip, biraz adamdy jumyspen qamtyp otyrǵan joldasy Dáýrenge de «úzdik kásipker atandyńyz, «Altyn kitapqa» enetin boldyńyz» dep 3-4 ret habarlasqan. Qosh delik. Bul az desek, áleýmettik jelilerde de osy máseleni qaýzap júrgender bar.
«Baǵana bireý zvondaıdy. «Sizdi Qazaqstannyń «Altyn kitabyna» qossaq dep edik, tósbelgisi qosa beriledi. Elordadan habarlasyp turmyn. Biz elimizde 12 salany qamtıtyn jetistikke jetken ózińiz sııaqty qoǵamǵa úlesin qosyp júrgen, basshylyq qyzmettegi azamattardy jınap jatyrmyz» deıdi.
Sońǵy sóılemderin estigende kózim qaraýytyp, lezde pańdanyp shyǵa kelgenimdi baıqamaı qalyppyn. Olardyń túp pıǵylyn bilip tursam da: «Iá, ne isteý kerek?» deppin óktem únmen. Osylaı da, osylaı...
Endi anaý altyn tústi medal yntyqtyryp barady. Keýdeńe taǵyp alyp, jıyndarda júrseń, quddy bári qurmetteıtindeı qııal berdi. Baǵasy 250 myń teńge, bólip tóleseń de bolady. Sizge skıdka bar demesi bar ma?!
Dereý esimdi jınap, men ózi ne istep edim dep, ómirbaıanymdy oılasam, eki abzastan aspaıdy eken. Kitapta fotom men eki joldan turatyn ómirbaıanym tursa, qoǵamǵa eńbegi sińgen, atpal azamat dep qana jaza salsa uıat qoı. Degenmen kóńil kúıimdi kótergenderine rahmet!», dep jazady sarkazmmen facebook-tegi dostarymyzdyń biri.
Degenmen qoǵamda ózine, atqaryp júrgen isine synı kózben qaraıtyn, shyndyq pen ótirikti ajyrata alatyn mundaı adamdar az, qarmaqqa ilinip júrgender de bar ekenin joqqa shyǵarýǵa bolmaıdy. Osy jazbadan keıin onyń áleýmettik paraqshasynda biraz adam ún qatty, osyǵan uqsas oqıǵalardy keltirdi.
Sol sııaqty áleýmettik jelide Ahmetbek Nursıla atty zamandasymyz da «aram bıznes, medal satyp aqsha tabý, kategorııa satyp aqsha tabý» heshtegterimen másele qozǵady. Sózderin kúzemeı, túzemeı aıtqanda, mazmuny tómendegideı.
«Bir jigit óte jaqsy tabys taýyp júr eken. Surastyra kelsem, tabys túri mynada: birinshisi – muǵalimderge medal satady, 50 myń shamasynda ǵoı deımin, ekinshisi – ustazdarǵa kategorııa satyp aqsha tabady eken.
Ony qalaı jasaıdy deısizder me? Ustazdarǵa arnap jýrnal shyǵarady. Muǵalimniń aqshasyna daıyn ǵylymı materıaldardy bir adamdarǵa daıyndatyp, jýrnalǵa ustazdyń atynan shyǵarady. «Ustaz» kategorııa alady, al myna «kásipker» aqsha tabady.
Osylaı bilim berý júıesiniń tamyryna balta shaýyp jatqanyn biledi, biraq ar-uıat degen nárseden jurdaı bolyp, aqshany birinshi orynǵa qoıyp alǵan soń qulqyny osyny istetedi.
Men «bul bıznes emes birinshi qylmys, ekinshi ultqa jasalyp jatqan qastandyq» qoı desem, «aǵa, qaıtesiz ony aıtyp, eldiń bári osylaı aqsha tabady» deıdi. Jaqynda sol jigittiń oranyp alyp Mekkede júrgen sýretin kórdim...».
Eger aqıqatyna kelsek, qoǵamnyń jegi qurtyna aınalǵan mundaı qylmyskerler júgendelip, olarǵa shara qoldanylýǵa tıis. Áıtpese, onsyz da ataq pen marapattardan mán ketip tur.
ALMATY
