Munaı-gaz salasyna arnalǵan ónim shyǵaratyn kásiporynnyń ashylý saltanatyna Mańǵystaý oblysy ákiminiń birinshi orynbasary B.Orynbasarov, «KAZAKH INVEST» ulttyq kompanııasy» AQ Eýropa elderi boıynsha óńirlik dırektory men fransııalyq «PCM Europe S. A. S» kompanııasynyń basshylary qatysty.
Quzyrly oryndar bergen málimetke súıensek, atalǵan kásiporyn jylyna 2 400 burandaly sorǵy men 600 jetek (prıvod) shyǵarady. Atalǵan óndiristi iske qosý arqyly óńirde jańa jumys oryndary ashylyp, óndiris oryndary zamanaýı qurylǵylarmen qamtamasyz etilmek.
– О́ńirdegi ekonomıkany damytýdyń basym baǵyttary óńdeý ónerkásibi, kólik jáne logıstıka, agroónerkásiptik keshen, týrızm jáne jańartylatyn energetıka ekeni belgili. Sońǵy bes jylda óńirge 7 mlrd AQSh dollarynan astam tikeleı sheteldik ınvestısııalar tartylǵanyn atap ótken jón. Bıylǵy 5 aıdyń ózinde 229 mlrd teńgeniń ınvestısııasy tartyldy, naqty kólem ındeksi – 101,0%. Bul kórsetkish ótken jyldyń osy merziminde, ıaǵnı 2021 jyldyń 5 aıynda 216 mlrd teńge bolǵan edi. Al bıyl oblysta shamamen 120 mlrd teńge somasyna 22 jobany iske asyrý josparlanyp otyr, – dedi oblys ákiminiń birinshi orynbasary B.Orynbasarov.
Aldaǵy ýaqytta burandaly sorǵy shyǵaratyn zaýyttyń alǵashqy jyldaǵy qaýqary 1 600 burandaly sorǵy jáne 400 jetek (prıvod) bolmaq. Al úshinshi kezeńde onyń kólemin jylyna 2 400 sorǵy men 600 jetekke (prıvod) deıin ulǵaıtý kózdelgen. Bul qosymsha 100 jańa jumys ornyn qurýǵa múmkindik bermek.
Mańǵystaý oblysy
