KASKO: Kóligińiz kóldeneń qaýipten saqtandyrylǵan ba?

Amanat saqtandyrý kompanııasy saıtyndaǵy málimetke súıensek, kólikti mindetti saq­tandyrý nemese AQJM – avtokólik ıesiniń azamattyq-quqyqtyq jaýapkershiligin mindetti saqtandyrý. Bul saqtandyrý túri sizdiń kináńizden bolǵan jol-kólik oqıǵasynan zardap shekken úshinshi tulǵaǵa materıaldyq shyǵyndy óteýge kepildik beredi. Naqtyraq aıtqanda, eger siz bireýdiń kóligine zaqym keltirseńiz, onda ózińiz tańdaǵan saqtandyrý kompanııasy mindetti polıs boıynsha álgi kólikti jóndeýge qarjy bóledi.

Qazaqstan zańy boıynsha, ár kólik júrgizýshi AQJM polı­sin resimdeýge mindetti. Eger júr­gizýshide mundaı saqtandyrý polısi bolmasa nemese onyń jaramdylyq merzimi ótip ketken bolsa, onda avtokólik ıesine 10 AEK (31 800 teńge) kóleminde aıyppul salynady.  Saqtandyrý polısiniń quny kólik júrgizýshiniń ótiline, kóliktiń jylyna baılanysty.

Al erikti saqtandyrý – KASKO-nyń jóni bólek. Saq­tan­dyrýdyń bul túri avtokólikti oqys oqıǵalardan, atap aıtqanda, órt, jarylys, jol apatynan, usaq buzaqylyqtan, vandalızmnen saqtandyrady. Mysaly, aýlada turǵan kólikti  syzyp ketý, terezesin syndyrý sekildi oqıǵalar jıi kezdesedi. Eger kóligińizdi mundaı usaq buzaqylyqtan, basqa da qaýip-qaterden saqtandyrǵan bolsańyz, onyń barlyq shyǵynyn KASKO-ny mindetine alǵan saqtandyrý kompanııasy tóleıdi.

Mamandardyń aıtýynsha, saqtandyrýdyń osy túri arqyly avtokólikti bas-aıaǵy 17 qaýipten saqtandyrýǵa bolady. Qaýip-qater táýekeliniń keń aýqymyn qamtıtyn bolǵandyqtan, álbette, bul saqtandyrýdyń quny qymbatyraq. Mysaly, kóligińizdi jol-kólik oqıǵasynan, urlyqtan, zaqymdanýdan saqtandyrǵyńyz kelse, onyń quny orta eseppen – 150 myń teńgege jýyqtaıdy. Jalpy alǵanda, KASKO somasy jeńil avtokólik úshin – jylyna avto qunynyń 3,5%-y kóleminde, kommersııaǵa arnalǵan avtokólik úshin – jylyna avto qunynyń 4%-y mólsherinde esepteledi.

KASKO-nyń saqtandyrý soma­sy erikti saqtandyrý kelisim­shar­tynda jáne «Saqtandyrý» grafasyndaǵy tólem kestesinde kórsetiledi.

Sońǵy jyldary mindetti avto­saqtandyrý polısine qosa, avtokas­ko erikti saqtandyrý polısterin alýshy avtojúrgizýshilerdiń sany aıtarlyqtaı ósipti. Ulttyq banktiń málimetterine súıensek, 2022 jyldyń bes aıy ishinde KASKO erikti saqtandyrý boıynsha saqtandyrý syılyqaqysynyń jalpy kólemi 16,3 mlrd teńgeni quraǵan. Bul – ótken jyldyń osy kezeńimen salystyrǵanda 26,4%-ǵa artyq kórsetkish.

KASKO polısin resimdegen qazaqstandyqtardyń 85%-y – er azamattar bolsa, 15%-y – áıelder. Kóbine 29-35 jas aralyǵyndaǵy azamattar kóligin keshendi saqtandyrýdy qup kóredi eken.

Freedom Insurance saqtandyrý kompanııasy mamandarynyń zertteýi boıynsha, KASKO polısin almatylyq júrgizýshileri jıi resimdeıdi. Odan keıingi orynda – Almaty oblysy bolsa, úshinshisi – elorda turǵyndary. Al Soltústik Qa­zaqstan jáne Qostanaı oblys­ta­rynyń avtojúrgizýshileri bul saqtandyrý túrin sırek paıdalanady.

Mamandardyń sózine qara­ǵanda, KASKO resimdegen júr­gi­zýshilerdiń deni jazataıym oqıǵalar men úshinshi tulǵanyń buzaqylyq áreketinen qorǵaý po­lısin tańdaıdy (39%-y). Al «te­mir tulparyn» jol-kólik oqıǵasynan saqtandyryp qoıǵan azamattardyń qatary – jalpy, KASKO resimdegen júrgizýshilerdiń 27%-yn quraıdy.

Jalpy, KASKO erikti saq­tan­dyrý 12 aıǵa resimdeledi jáne saqtandyrý somasy bitkenshe qoldanýǵa bolady.