Atyraýlyq áýesqoı balyq aýlaýshy Lenar Mýborakshaevtyń joly boldy deýge tolyq negiz bar. Jaqynda onyń qarmaǵyna alyp jaıyn tústi. Munaıly shahardy qaq jara aǵyp jatqan Jaıyq ózeninen aýlanǵan jaıynnyń salmaǵy – 30 kılo, uzyndyǵy – 1,5 metrden astam.
Sarǵysh tústi alyp jaıyn alystan qarasańyz, altyn túske boıalǵandaı. Ony Jaıyqtan tartyp shyǵarý ońaı bolmady. Degenmen sýdan marjan súzýdiń qyr-syryn jetik meńgergen Lenar Mýborakshaev qarmaǵyna túsken oljasynan aıyrylǵan joq.
– Qazir Jaıyq ózeninde sazan, jaıyn, ózge de qara balyqtar bar. Biraq burynǵydaı emes, balyq múldem azaıdy. Keıde qarmaqqa eshteńe túspeýi múmkin. Balyq ta árkimniń nesibesine qaraı qarmaqqa túsedi. Osyndaı alyp balyqty qabýy ǵajap emes. Jaıyndy Jaıyqtyń qalanyń ortalyǵyndaǵy bóliginen aýladym, – deıdi Lenar Mýborakshaev.
Atyraý oblysy
