«Saryarqa» – Bratına Kýbogynyń ıegeri

Qaraǵandynyń «Saryarqa» hokkeı komandasy burnaǵy kúni Joǵary hokkeı lıgasy (JKH) pleı-off serııasynyń fınaldyq matchynyń jalpy qorytyndysynda Túmenniń «Rýbın» jasaǵyn 4:2 etip utyp, Bratına Kýbogynyń ıegeri atandy. Osylaısha qaraǵandylyqtar Reseıdiń Joǵary hokkeı lıgasyna qatysyp júrgen shet­elder jamaǵattary arasynda birinshi bolyp atalmysh belesti baǵyndyrdy. Kenshiler qalasy hokkeıshiler ujymyn osynaý zor jetistigimen Memleket basshysy Nursultan Nazarbaev sol kúni quttyqtady. Aıta ketýimiz kerek, serııadaǵy altynshy sońǵy kezdesý Qaraǵandy qalasynda ótti. Asa tartys ústinde órnektelgen matchtyń aqyrynda alań ıeleri 2:1 esebimen jeńiske jetti. Bul jalpy eseptiń 4:2 bolýyn qamtamasyz etti. Al jeńimpazdardan shaıbany Sergeı Elızarov pen Vladıslav Lýkın salsa, qonaqtardan Aleksandr Neznamov kózge tústi. Sol sııaqty «Saryarqanyń» shabýylshysy Konstantın Makarov Bratına Kýbogynyń eń qundy oıynshysy atandy. Osy jeńisti serııa aıaqtalǵan boıda Joǵary hokkeı lıgasynyń basqarýshy dırektory German Skoropýpov qatarynan ekinshi jyl Bratına Kýbogynyń fınalynda shaıqasyp, onyń sońǵysynda dittegen bıigine jetken «Saryarqa» klýbyn Qurlyqtyq hokkeı lıgasyna (KHL) jiberýge daıyn ekenin bildirdi. Damır QOJAMQUL.