Qaıǵyly oqıǵa sýǵa túsý maýsymy ashylǵaly beri Qapshaǵaı sý qoımasynyń demalysy oryndarynda jıi qaıtalanady. О́tken bir aıdyń shamasynda birneshe márte dabyl qaǵylyp, qutqarýshylar kómegine júgingender sany artqan. Onyń ishinde birneshe oqıǵa adam ólimimen aıaqtalypty.Tótenshe jaǵdaı qyzmetiniń mamandary adam ólimine aparyp soǵatyn jaǵdaılardyń barlyǵy derlik arnaıy belgi qoıylmaǵan, ıaǵnı sýǵa túsýge ruqsat etilmegen aılaqtarda bolatynyn aıtady. Jaǵalaýdyń kózden tasa jatqan bólikterinde sýǵa túsý óte qaýipti. Kóbine aıaq asty sýǵa batyp ketken adamdy qutqarý úshin mamandar jetip úlgermeıdi eken. Máselen, jaqynda Qapshaǵaıdaǵy «Golýboı zalıv» atalatyn demalys orny mańynda tórt adam birdeı sýǵa batyp ketti. Ajal aıtyp kelmeıdi degendeı, oqys jaǵdaıdyń saldarynan bir otbasy túgelimen sý astynda tunshyǵyp, qutqarýshylar kómek qolyn soza almaǵan.
– Sý qoımasynda shomylý barysynda tolqyn kóterilip, eki aǵaıyndy bala bata bastaǵan. Olardy aǵasy, tátesi jáne apasy qutqarýǵa umtylǵan. Biraq ókinishke qaraı, tek apasy ǵana aman qaldy. Qutqarýshylar eki bala men er adamnyń denesin sýdan alyp shyqty. Biz únemi azamattardan arnaıy jabdyqtalǵan oryndarda ǵana sýǵa shomylýdy, júze almaıtyn adamdardy belden joǵary tereńdiktegi sýǵa túspeýdi, balalardy sý janynda qaraýsyz qaldyrmaýdy, sý janynda demalý kezinde spırttik ishimdikterdi ishpeýdi jáne tolqyndar men daýyldy aýa raıynda sýǵa shomylmaýdy suraımyz. О́kinishke qaraı, adamdar bul qaýipti eskere bermeıdi, – deıdi oblystyq Tótenshe jaǵdaılar departamentiniń ókili.
Jalpy, Qonaev qalasynda qutqarýshylar kezekshiligi uıymdastyrylǵan 7 qalalyq jaǵajaı bar. Olar qutqarý munaralarymen jáne shomylý kezinde adamdardyń qaýipsizdigin qamtamasyz etý úshin basqa da qajetti quraldarmen jabdyqtalǵan. Al kól jaǵalaýynda 140 shamasynda jeke demalys orny bar.
Qazir qutqarýshylardan maza ketti dese de bolady. Olardyń qyraǵylyǵynyń arqasynda ajaldan aman qalǵandar da jeterlik. Taıaýda ǵana Qapshaǵaıda úrlemeli matraspen jaǵadan 250 metr alysqa júzip ketken 1997 jylǵy er adam qutqaryldy. Dál osy sátte jaǵadan 400 metr qashyqtyqqa alystap, sýǵa batý qaýpi tóngen taǵy eki er adamǵa kómek kórsetilgen eken. О́kinishke qaraı, taǵy bir kúni qutqarýshylar Qapshaǵaı kólinen 2004 jyly týǵan jasóspirimniń denesin alyp shyqty. Jasóspirimge alǵashqy medısınalyq kómek kórsetilgenimen esh nátıje bolmaǵan.
Aıtpaqshy, jyl basynan beri elimizde 134 adam sýǵa ketip qaıtys bolsa, onyń ishinde 51 bala bar. Al birinshi maýsymnan beri 91 adamnyń ajaly sýdan kelse, onyń da otyz segizi jasóspirim eken. Osy aralyqta qutqarýshylar 98 eresek adam men 29 balany qutqaryp, ajaldan aman alyp qalǵan kórinedi.
Almaty oblysy
