О́zekti máseleni Semeıge kelgen Parlament Májilisi depýtattarynyń aldynda jergilikti belsendiler taǵy da kóterdi. Máselen, qoǵam belsendisi, Amanat partııasynyń múshesi Vladımır Halınniń pikirine súıensek, óńirdegi gazdandyrý máselesi 2013 jyldan beri aıtylyp keledi. Alaıda osy ýaqytqa deıin seń qozǵalar emes.
«Atalǵan máseleniń Parlament pen Úkimettiń deńgeıinde talqylanǵanyn, sondaı-aq Semeı men Shyǵys Qazaqstanda gazdandyrýdy pysyqtaý jónindegi komıssııa qurylyp, gaz taratylatyn jeliniń bir bóligi Pavlodarǵa deıin jalǵasatyny týraly habardarmyz. Osy maqsatta kógildir otyndy taratýdyń birneshe baǵyty ázirlengeni málim. Atap aıtqanda, Ortalyq Qazaqstannan tartý múmkindigi qarastyrylǵan edi. Alaıda onyń shyǵyny kóp. Zaısan jaqtan da gazǵa qosylýǵa bolady, biraq onda qajetti otynnyń qory az. Úshinshi nusqa – Reseıdegi Altaı óńirin gazdandyryp otyrǵan Veseloıar qubyryna qosylý», dedi V.Halın.
Qoǵam belsendisi qalanyń ekologııalyq ahýaly kóńil kónshitpeıtinin jáne jylý qazandyqtarynan aýaǵa shyǵyp jatqan zııandy qaldyqtyń kólemi edáýir ekenin jetkizdi. Bul rette Qazaqstan 2060 jylǵa qaraı kómirteginen tolyq arylýdy kózdep otyrǵanyn aıta ketken oryndy. Sol sebepti Jańa Qazaqstanda osyndaı túıtkildi máseleler óz sheshimin tabý kerek dep sanaıdy jergilikti qoǵamdyq uıym ókilderi.
«Bul máseleni biz mindetti túrde qarastyryp, áriptesterimizben aqyldasamyz. Ony sheshýdiń joldaryn pysyqtaý qajet. Atalǵan baǵytta Úkimetpen birlesip, barlyq yqtımal jobany jınaqtap, usynystardy jetkizemiz», dedi Parlament Májilisiniń depýtaty Ámirhan Rahymjanov.
Budan bólek, óńirdegi taǵy bir qordalanǵan problemalardyń biri – ábden tozyǵy jetken joldar máselesi. Májilis depýtattary oblystyń shalǵaı eldi mekenderine sapar shegip, rasymen de jol ınfraqurylymy jiti kóńildi qajet etetinin moıyndady.
«Abaı, Aqsýat, Kókpekti jáne Katonqaraǵaı aýdandary men Kýrchatov qalalaryn aralap qaıttym. Jol máselesiniń ózektiligi artyp turǵanyn baıqadym. Dese de seń qozǵaldy dep aıtýǵa bolady. Álbette, qalǵan ýaqyttyń ishinde 405 shaqyrym joldy jóndeý múmkin emes. Maıqapshaǵaıdan Zaısanǵa qaraı, sol sekildi Kókpektiden Qalbataýǵa deıingi joldy jóndeý bastalyp ketti. Alaıda Aqsýattan bastap Kókpektige deıingi jol ýchaskesinde adam aıaǵy baspaǵany kórinip tur. Eger de bıyl kem degende 100 shaqyrymdaı joldy jóndep ótse, onyń ózi jaman emes», dedi Á.Rahymjanov.
Al Janat Omarbekova aıtqandaı, Semeı elimizdiń mádenı jáne tarıhı ortalyǵy sanalatyndyqtan qaladaǵy kóneden syr shertetin arhıtektýralyq nysandardy saqtap, qalpyna keltirýge kóńil bólý kerek.
«Mádenıet mınıstrligimen birlesip, qaladaǵy tarıhı ǵımarattardy saqtaý máselesin kóterdik. О́ıtkeni Semeı óziniń tarıhı muralarymen áıgili. Semeılikterdiń qoqys úıindilerine baılanysty shaǵymdanyp jatqanyn bilemiz. Aıtalyq, mundaı kórinisti saıabaqtar men úılerdiń janynan ótkende baıqaýǵa bolady. Bul oraıda tazalyqty árkim ózinen bastap, balalarǵa úlgi kórsete bilý kerek», dedi Májilis depýtaty.
Abaı oblysy
