QR Energetıka mınıstrligi baspasóz qyzmetiniń málimetinshe, komıssııa Petropavldaǵy jylý-elektr ortalyǵy tútin murjasynyń qulaý sebepterin tolyq anyqtaý maqsatynda qurylyp, qazandyqtardyń jumys tártibine, odan shyǵatyn gazdardyń parametrlerine, tútin murjasyn paıdalaný rejımine, murjadaǵy tútin gazdarynyń ólshemderine energetıkalyq saraptama taǵaıyndalǵan edi. Sondaı-aq №1 tútin murjasyna da tehnıkalyq qurylys saraptamasy júrgizildi.
Nátıjesinde komıssııa murjanyń qulaýynyń birneshe sebebin atady:
- tútin murjasyn salýdyń jobalaý jáne betondaý kezeńinde aqaýlar jiberilgen;
- tútin murjasy tıisinshe paıdalanylmaǵan, ıaǵnı josparly-aldyn ala jóndeý jumystary, kezekti tekserýler merziminde júrgizilmegen;
- qazandyqtardan tys shyǵatyn gazdardyń temperatýrasy bóliginde qazandyqtardyń jumys rejımderin saqtamaý;
- qazandyqtardyń joǵary apattylyǵy jáne qazandyqtardyń avarııalyq toqtatylýynan keıin mazýtty paıdalana otyryp, kondensattyń túzilýine jáne tómen temperatýraly korrozııaǵa qatysty gaz joly men tútin murjasynyń jumys jaǵdaılarynyń nasharlaýyna ákep soqqan jıi iske qosylýy;
- Petropavl 2-JEO basshylyq quramy men jaýapty mamandary tarapynan tıisti baqylaýdyń bolmaýy.
Osylaısha, joǵaryda atalǵan faktorlardyń jıyntyǵy tútin murjasynyń qulaýyna sebep boldy.
Komıssııa jumysynyń nátıjeleri boıynsha osyndaı tehnologııalyq buzýshylyqtarǵa jol bermeý jónindegi negizgi uıymdastyrýshylyq jáne tehnıkalyq is-sharalar ázirlendi.
Al anyqtalǵan zań buzýshylyqtar men kemshilikter derekteri boıynsha Qazaqstan Respýblıkasynyń zańnamasyna saı tıisti sharalar qabyldanady.
Stansııa jabdyqtarynyń isten shyǵyp, birneshe ret toqtaýyna sebep bolǵan 2021-2022 jyldardaǵy kúzgi-qysqy kezeńindegi jóndeý naýqany barysynda jiberilgen kemshilikter úshin Dırektorlar keńesiniń sheshimimen «Sevkazenergo» AQ jaýapty basshylaryn laýazymynan bosatý jáne laýazymyn tómendetý túrindegi tártiptik sharalar qabyldandy.
Aldaǵy jylytý maýsymyna sapaly daıyndalý jáne senimdi ótkizý maqsatynda «Sevkazenergo» AQ Petropavl 2-JEO jumysyn qalypqa keltirý boıynsha Jol kartasyn iske asyryp jatyr. Jol kartasynyń oryndalýy QR Energetıka mınıstrliginiń baqylaýynda, apta saıyn kóshpeli monıtorıng júrgiziledi. Osyndaı kóshpeli keńes 17 shildede Petropavl 2-JEO-da QR Energetıka mınıstrligi ókilderiniń qatysýymen ótti, onda Jol kartasynyń oryndalý barysy tekserildi.
Eske sala keteıik, 20 naýryzda Petropavldaǵy jylý-elektr ortalyǵynyń tútin murjasy jartylaı opyrylyp qulaǵan edi. Saldarynan jumysshy áıel mert boldy.
