21 shildedegi jaǵdaıǵa sáıkes Abaı oblysyndaǵy benzın qory kelesideı. Aıtalyq, AI-92 benzıni munaı bazalarynda 7,16 myń tonna jáne 5,6 myń tonnasy jolda kele jatyr (joldy esepke alǵanda 16 kúnge jetkilikti). AI-95 benzıni 0,77 myń tonna jáne joldaǵysy 1,82 myń tonna (joldy esepke alǵanda 16 kúnge jetkilikti). Dızel otyny 15,08 myń tonna jáne jolda kele jatqany 1,91 myń tonna (joldy esepke alǵanda 16 kúnge jetkilikti).
Qazir munaı óńdeý zaýytynan AI-92 men AI-95 benzınin óńirlerge qaraı jóneltý jumystary kúsheıtildi.
Alakóldegi jaǵdaıǵa toqtalsaq, Qabanbaı aýylyndaǵy eki jekemenshik jaǵarmaı quıý stansasyna Petro retail JShS (QazaqOil JQS jelisi) 60 tonnadaı suıyq otyndy bólip berdi. Aqsýat aýdanyndaǵy 4 jekemenshik JQS-da qajetti jaǵarmaı kólemi berildi.
Aıagózge «QazMunaıGaz» «PetroKazahstan Oıl Prodakts» kásipornynan 625 tonna benzındi jetkizý josparlanyp otyr. Sondaı-aq Petro retail JShS jedel tártipte Aqsýat aýdanynyń 4 JQS-na jaǵarmaıdy sata bastady. Osyǵan deıin atalǵan 4 JQS suıyq otyndy «Parnas» JShS-nan satyp alyp kelgen. Alaıda bul kompanııamen baılanysqa shyǵý qıyndaǵandyqtan jaǵarmaı stansalaryn energııa tasyǵyshtarmen qamtýǵa baılanysty problemalar týyndasa kerek.
Osyndaı jaǵdaılarǵa tap bolmas úshin atalǵan jaǵarmaı stansalarynyń ıelerine bırjada tirkelip, suıyq otynnyń saýdasyna qatysýǵa keńes berildi. Bul óz kezeginde qajetti resýrsty tikeleı óndirýshilerden alýǵa jol ashady. Atalǵan máseleni óńir basshysy Nurlan Uranhaev tikeleı baqylaýynda ustap otyrǵanyn jetkizdi.
Abaı oblysy
