Músháıra

Aq saýytyn kıinip, ata-babanyń aq týyn kóterip, qazaq dalasynyń aýmaqtyq tutastyǵy men shekara shebiniń bútindigin qas qaqpaı kúzetip, qasyq qany qalǵansha jońǵarlarmen aıqasyp, qasıetti atamekenniń synyq súıem topyraǵyn jaýǵa taptatpaı azat etken arýaqty batyr, qaharman handar, aqylman bıler búgingi áleýetti de sáýletti Qazaq eliniń tereń tamyryna nár beretin sarqylmas qýat desek bolady. Sondaı tulǵalardyń biri – bıyl týǵanyna 300 jyl tolyp otyrǵan jaýjúrek sardar, qabyrǵaly bı, kóregen qolbasy Er Jánibek Berdáýletuly. Osyǵan oraı Shyǵys Qazaqstan oblysy ákimdigi «El qorǵany – Er Jánibek» atty respýblıkalyq ashyq músháıra jarııalaıdy. Músháıranyń maqsaty – eregesken jaýyn jer jastandyrǵan, eliniń shekarasyn keýdesimen qorǵaǵan batyr baba Er Jánibektiń jeńimpazdyq jolyn jyr jolymen órnekteý. Sonymen qatar, Er Jánibekpen birge el namysyn qorǵaǵan kósem, sóz bastaǵan sheshen Han Abylaı, qarakereı Qabanbaı, qanjyǵaly Bógenbeı, shapyrashty Naýryzbaı, Tóle, Áıteke, Qazybek bıler sekildi kóptegen tarıhı tulǵalardyń yntymaǵy men eldi biriktirý jolynda atqarǵan ólsheýsiz eńbegin óleńmen dáriptep, jastarǵa úlgi etý. Er Jánibektiń sońynda qal­ǵan muraǵattaǵy ańyz-ápsanalar, sheshendik sózder, mýzeıdegi joryq saptyaıaǵy, QHR-daǵy qazaqtar arasynan tabylǵan týy salynǵan sandyq, kezdik sekildi muralaryn óleń jyrǵa ózek ete otyryp, batyrdyń dańqty joly búgingi urpaqqa jalǵasqanyn madaq etý. Er Jánibektiń eliniń birligi men yntymaǵy, jeriniń aýmaqtyq tutastyǵy, halqynyń yrys-berekesi jolynda ómirin sarp etken qabyrǵaly bı, kóregen qolbasshy retindegi tul­ǵasyn somdap, óleńmen órnekteý. Eń negizi – el basyna kún týǵan alqakól sulama, aqtaban shubyryndydan halqyn qutqaryp, urpaǵyn búgingi kúnge aman-esen jetkizýge negiz qalaǵan qaharman tulǵalardyń jıyntyq beınesin, zamana bederin toptastyra somdaý. Batyr babanyń keskin-kelbetin jyr tilimen aıshyqty somdap, oqyrmannyń patrıottyq sezimine áser etip, júregin terbete alatyn kórkem týyndyǵa júlde beriledi. Músháıraǵa esh jerde jaryq kórmegen óleńder, tolǵaýlar, poemalar qabyldanady. Bas júlde – jeńil avtokólik; birinshi oryn – bireý; ekinshi oryn – ekeý; úshinshi oryn – úsheý; yntalandyrý syılyqtary – beseý. Músháıraǵa qatysýshylardyń shyǵarmalary kompıýterge basylǵan bes danadan kem emes jáne elektrondy nusqasymen 2014 jyldyń 1 tamyzyna deıin myna mekenjaıǵa kelip túsýi kerek: Indeks: 010000, Astana qalasy, Áýezov kóshesi, 20 «A», Sáken Seıfýllın murajaıy. Tel: 32-84-67, 53-34-03, e-mail:astanakalamger@mail.ru. Músháıra qorytyndysy 2014 jyldyń 15 tamyz kúni shyǵarylady. Júldegerlerdiń О́skemen qalasyna kelip-ketý jol shyǵyny men jatar orny máselesin uıymdastyrý komıteti moınyna almaıdy. Qazylar alqasynyń sheshimi qaıta qaralmaıdy dep habarlady uıymdastyrý komıteti.