Jaqynda Túrkistan qalasynda OQO ákimi janyndaǵy «Yrys aldy ─ yntymaq» qoǵamdyq forýmy men oblystyq Qazaqstan halqy Assambleıasynyń birlesken jıyny uıymdastyryldy. Bul basqosý «Turaqtylyq tuǵyry ─ tatýlyq» dep ataldy. Qoja Ahmet Iаsaýı atyndaǵy Qazaq-túrik ýnıversıteti mádenıet ortalyǵynyń úlken májilis zaly ulystyń uıytqysy atanǵan Ońtústiktiń barlyq aýdandary men qalalarynan jınalǵan jurtshylyqqa lyq toldy. Olardyń ishinde qazaqtan bastap ózbek, orys, túrik, tájik, koreı, tatar, nemis, ýkraın, grýzın, ázerbaıjan, grek, kúrd, taǵy basqa da kóptegen ulttardyń ókilderi bar.
Mádenıet ortalyǵyndaǵy jıyn bastalǵanǵa deıin birneshe saǵat boıy aýdandar men qalalardan barǵan delegasııalar Túrkistan shaharyndaǵy jańadan iske qosylǵan qurylys nysandaryn tamashalaǵan bolatyn. Ásirese, Áziret Sultan kesenesiniń qarsy betindegi burynǵy qıqy-jıqy qujyralardyń ornyna eńselene boı kótergen zamanaýı kórmeler zaly, qolóner úıi, zııaratshylar meımanhanasy sııaqty ǵımarattar keremet unady. Rýhanı ortalyqtardyń kóneleri qatarynda sanalatyn shahardyń kórkeıýi qaı qazaqstandyqtyń da maqtanysh sezimin týyndatary sózsiz. Sonymen, birlesken jıyn da bastaldy. Oblys ákimi Asqar Myrzahmetov «Turaqtylyq tuǵyry – tatýlyq» atty baıandamasynda Elbasynyń: «Beıbitshilik pen kelisimdi nyǵaıtý – «Qazaqstan-2050» Strategııasyn júzege asyrýdyń basty krıterııi» degen qaǵıdatynan bastap, oblysta atqarylyp jatqan izgi ister, sondaı-aq, yntymaq pen birlikti, tatýlyqty, saıyp kelgende, Táýelsizdikti kún saıyn nyǵaıtý jónindegi mindetterge keńinen toqtaldy.
Jıynǵa qatysýshylar, jaryssózge shyqqandar «Yrys aldy – yntymaq» qoǵamdyq forýmynyń oblystyq assambleıamen, ózge de uıymdarmen birge júzelegen jaqsy isteri týraly aǵynan jaryla aıtty. «Yrys aldy – yntymaq» qoǵamdyq forýmy oblys basshysynyń bastamasymen 2009 jylǵy 22 naýryzda – Ulystyń uly kúninde, osy Túrkistanda tusaýyn kesken edi. Bes jyldyń ishinde qyrýar jumystar atqaryldy. Qazyǵurt taýynyń baýraıynda, Mártóbede, Ordabasy taýynda, Jetisaıda, Tóle bı aýdanynda, Aqsý-Jabaǵyly qoryǵy mańynda, sondaı-aq, oblys ortalyǵynda birneshe ret uzyn sany jıyrmadan asa jalpy jıyn uıymdastyrylyp, olarda alýan túrli taqyryptar talqylandy.
Qazir barlyq aýdandar men qalalarda, kóptegen aýyldar men mektepterge deıin «Yrys aldy – yntymaq» forýmdary jumys isteıdi. Forýmnyń bes jyldyǵyna arnalǵan Túrkistan jıynynda Astanadan kelgen senator Ikram Adyrbekov, Ulttyq ǵylym akademııasynyń prezıdenti Murat Jurynov asa baǵaly pikirlerin ortaǵa saldy. Ultaralyq dostyqtyń baǵasyn bilý, qazaq halqynyń meımandostyǵy men keńpeıildiligin qadirlep, búgingi jas urpaqqa, ásirese, ózge ult ókilderiniń jastaryna uǵyndyrý jónindegi usynystary jurtshylyqqa unady. Basqa da sóz alǵan túrli ult ókilderi qoǵam qaıratkerleriniń oılaryn yqylaspen qoldady.
Forým men jergilikti assambleıanyń birlesken basqosýynda maǵan da sóz berildi. Men Prezıdentimizdiń: «Qazaqty qasıetti qarashańyraqqa balasaq, elimizdegi barsha etnostar – sol shańyraqqa shanshylǵan ýyqtar», degen sózin qatty qasterleımin. Shirkin, qazaǵymnyń keńdigine eshqandaı keremetti teńgere almaımyn. Biz qazaq halqynyń tózimdiligin, aqjúrektiligin qashan da qadirleı bilýge tıispiz. Ońtústiktiń qaı ultynyń zııalylary da muny tereń túsinedi dep oılaımyn. Shańyraǵymyz bıik, ýyqtary berik bola bersin.
Akabaı HÝDAIKÝLOV,
Ońtústik Qazaqstan oblystyq Qazaqstan halqy Assambleıasy tóraǵasynyń orynbasary, oblystyq tájik etnomádenı birlestiginiń tóraǵasy, Maqtaral aýdanynyń qurmetti azamaty.
