Yqpaldastyqtyń deńgeıi joǵary

Azııa Damý banki Bas­qa­rýshylar keńesiniń bıyl­ǵy 47-májilisi alǵash ret Qazaqstanda ótkeli otyr. Mamyr aıynyń 2-5 kúnderi aralyǵynda ótetin 47-shi májilistiń negizgi taqyryby «Jańa Jibek joly»: Azııany ózgeristegi álemmen ushtastyrý» dep atalady. Osy qarjygerlerdiń halyqaralyq basqosýynyń mańyzy týraly qysqasha pikirin bilý úshin «Samuryq-Qazyna» UÁQ» AQ basqarma tóraǵasynyń orynbasary Elena BAHMÝTOVANY áńgimege tartqan edik. – Elena Leonıdovna, siz Azııa Damý bankiniń (ADB) Qazaqstan men ADB-niń qazirgi ózara ynty­maqtas­tyq deńgeıin qalaı baǵa­laısyz? – Qazaqstan men ADB arasynda yntymaqtastyq ornaǵanyna kóp jyl boldy. Osy ýaqyt aralyǵynda bank elimizdegi ekonomıkalyq-áleýmettik reformalardy júzege asyrýǵa baǵyttalǵan kóptegen mańyzdy jobalarǵa qoldaý kórsetti. Resmı málimetter Qazaqstan men Azııa Damý banki arasyndaǵy yntymaqtastyqtyń joǵary deńgeıde ekenin kórsetedi. О́ıtkeni, atalǵan uıym ekonomıka salasynda memlekettik organdarmen de, jeke menshik uıymdarmen de birlesip, túrli jobalardy júzege asyryp keledi. Olardyń barlyǵy derlik ekonomıkalyq ósýdi qamtamasyz etýge, jeke sektor men ınfraqurylymdardy damytýǵa negizdelgen. Sondaı-aq, Azııa Damý banki gýma­nı­tar­lyq salaǵa, naqtylaı aıtsaq, aımaq­tyq ıntegrasııa, genderlik teńdik, áleýmettik damý jáne ekologııany qorǵaý máselelerine de belsendi túrde qoldaý kórsetip keledi. – Sizdiń pikirińizshe, osy yn­ty­maqtastyqty basqa da baǵyttarda odan ári keńeı­týdiń qajettiligi bar ma? – Árıne, Qazaqstan men atalǵan banktiń ynty­maq­tastyq ólshemderi 2012-2016 jyldarǵa arnalǵan áriptestik strategııasynda naqty kór­se­tilgen. Osy qujatqa sáıkes, ADB jeke sektordy damytýǵa, ekonomıkany ártaraptandyrý jobalaryna keń kólemde qoldaý kórsetedi. Taraptar tehnıkalyq, basqa da kómekke qatysty áleýmettik bastamalar aıasynda birlese jumys atqarady. Astanada 2-4 mamyr aralyǵynda ADB Bas­qa­rý­shylar keńesiniń jyl saıynǵy 47-shi májilisi ótkeli otyr. Mańyzdy basqosýda aımaqtyq ıntegrasııa­ny damytýǵa qa­tysty ózekti máseleler erek­she nazarǵa alynady. Son­dyqtan, osy májilis barysynda áriptestikti odan ári tereńdetýdiń jańa baǵyttary aıqyndalady dep oılaımyn. – ADB negizinen saýda, energetıka, kólik salalaryn damytýǵa múddeli. Osy oraıda, «Samuryq-Qa­zyna» AQ-tyń tikeleı joba­laryn júzege asyrýǵa ADB-men tyǵyz baılanys jasa­maý­laryńyzdyń sebebi nede? – Rasynda, qazirgi ýaqytta ADB men «Samuryq Qazyna» ulttyq ál-aýqat qorynyń birlesip qolǵa alǵan jobalary joq deýge bolady. Alaıda, ADB qyzyǵýshylyq tanytqan jaǵdaıda, Qor kompanııalary da ınfraqurylymdyq jáne ınvestısııalyq jobalardy júzege asyrýǵa daıyn ekendigin baǵamdaýǵa bolady. – «Samuryq-Qazyna» AQ jobalardy júzege asyrý úshin ADB-den qaryz alý múmkindigin qarastyryp jatyr ma? Olaı bolǵanda qaı salalar qamtylmaq? – Búgingi kúni Qor men onyń kompanııalarynyń ın­ves­tısııalyq qyzmeti óte aýqymdy deýge bolady. Onyń qatarynda «Samuryq-Qazyna» bolashaqta ınvestısııa tartýdy kózdep otyrǵan birqatar jobalar da bar. Sonyń ishinde, kólik, energetıka, qurylys salalary boıynsha qarjylandyrýdy qajet etetin iri josparlar bar. Osy oraıda «Qorǵas – Shyǵys qaqpasy» arnaıy ekonomıkalyq aımaǵyn qurý jáne ony keshendi damytý, Aqtaý portyn sol­tústik baǵytqa keńeıtý, «Ult­tyq ındýstrııalyq munaı-hımııa tehnoparki» AEA ınfraqurylymdyq nysan­darynyń qurylysy, «Bogatyr» kómir razrezinde kómir óndirýdiń jańa tehnologııasyn engizý jobalaryn aıryqsha atap ótýge bolady. Eger ADB atalǵan jobalarǵa qyzyǵýshylyq tanytsa, Ulttyq qor osyǵan baılanysty jobalardy qarjylandyrý, ortaq qarjylandyrý, tehnıkalyq máselelerine qatysty túrli usynystardy qaraýǵa daıyn. – Áńgimeńizge rahmet. Áńgimelesken Jylqybaı Jaǵyparuly, «Egemen Qazaqstan».