Elimiz keıbir kórsetkishter boıynsha damyǵan 30 memlekettiń qatarynda

ASTANA. 4 mamyr. Qazaqstan qazirdiń ózinde keıbir kórsetkishterdi alyp qaraǵanda álemdegi damyǵan 30 eldiń qatarynda tur. Ortalyq kommýnıkasııalar qyzmetiniń Táýelsizdik saraıynda ótken kóshpeli brıfınginde Damýshy naryqtar forýmynyń aǵa zertteýshisi, Dúnıejúzilik banktiń óńirlik burynǵy vıse-prezıdenti Iohannes Lınn osylaı dedi. Bul týraly Bnews.kz habarlady. Brıfıngte Iohannes Lınn «Qazaqstan-2050» strategııasyna toqtala kele: «Qazaqstan-2050»: qazirgi zamanǵy ınklıýzıvtik qoǵam jolynda» kitabynda strategııany júzege asyrýdyń jeti basym baǵyty belgilengen. Olar: turǵyndardyń bilimi men densaýlyǵyna erekshe kóńil bóle otyryp, adam áleýetin damytý, tıimdi engergetıka, «jasyl» ósim, aımaqtar men qalalardy damytý, ártaraptandyrylǵan zamanaýı ınnovasııalyq ekonomıka, aımaqtyq jáne ǵalamdyq ekonomıkalyq ıntegrasııa men yntymaqtastyq, turaqty jáne ashyq ekonomıkalyq ári saıası ınstıtýttar qurý», – dedi. О́z sózinde Qazaqstannyń áleýetin joǵary baǵalaǵan maman Memleket basshysynyń oılarynan ozyq 30 eldiń qataryna qosylýmen ǵana shektelip qalmaıtynyn ańǵarǵanyn jetkizdi. Iohannes Lınn: «Prezıdent qazaqstandyqtardyń ál-aýqatyn arttyrýdyń mańyzdylyǵyn, áleýmettik ınstıtýttardy damytý máselesin jáne qorshaǵan orta týraly aıtty. Eger, qazirgi kúni halyqaralyq ósimge, ındekster men kórsetkishterge, sosyn Qazaqstannyń jaǵdaıyna qarasaq, onda alǵa qoıǵan maqsattarǵa qol jetkizý úshin eldegi ómir sapasyn qanshalyqty deńgeıde jaqsartý kerek? Bul jerde áńgime jan basyna tıetin tabysta ǵana bolyp otyrǵan joq. Sondyqtan da, biz Qazaqstan qazirdiń ózinde birqatar kórsetkishter boıynsha ozyq 30 eldiń qatarynda tur degen pikirge kelemiz», –dedi. Joldybaı Bazar. Derekkóz: Bnews.kz. Foto: Toptj.com.