Elimiz nebary 15 jylda qarqyndy damýshy memleketterdiń bestigine qosyldy

ASTANA. 4 mamyr. Memleket basshysy Azııa damý banki basqarýshylar keńesiniń 47-otyrysynda el ekonomıkasynyń damýy tarıhyna jan-jaqty toqtaldy. Bul týraly Bnews.kz habarlady. Basqosýda Nursultan Nazarbaev: «Búgin biz Uly jibek jolyn jańǵyrtýdyń jańa kezeńin baıqap otyrmyz, ol Azııa damýynyń jańa kezeńi bolatyndyǵyna senimdimin. Bul úshin barlyq jaǵdaı bar. Azııa – Qytaı, Úndistan, Japonııa, Ońtústik Koreıa jáne t.b. Azııanyń damýshy elderin biriktiretin serpindi damyp kele jatqan aımaq. Bul – tutynýshylar suranysyn qamtamasyz etetin álemniń kóp halqy shoǵyrlanǵan aımaq. Sarapshylardyń aıtýynsha, 2050 jyly álemdik saýdanyń jartysynan kóbi, ınvestısııa men jalpy ishki ónim Azııada jınaqtalmaq. Bul gúldenýdiń jańa ssenarııi, Azııa ǵasyrynyń bastalýy. Bizge barlyq kúshti biriktirý kerek», – dedi. Sonymen qatar, Prezıdent memleketimizdiń damýy barysyn sóz ete otyryp, 1997 jyldan beri jalpy ishki ónimniń artqandyǵyna, jedel damýshy elderdiń aldyńǵy bestigine engenimizge naqty dálelder keltirdi. Prezıdent: «1997 jyldan beri Qazaqstannyń jalpy ishki ónimi 10 esege artty. Onyń ortashajyldyq ósim qarqyny shamamen 6 paıyzdy qurady. Qazaqstan qarqyndy damýshy elderdiń bestigine nebary 15 jylda endi. Ekonomıkanyń udaıy ósimi el halqynyń tabysyn eki esege arttyrýǵa kómektesti. Kedeıshilik deńgeıi 38 paıyzdan 3 paıyzǵa deıin, ıaǵnı, 13 esege azaıdy», – dedi. Joldybaı Bazar. Derekkóz: Bnews.kz. Foto: Bnews.kz.