Atyraý voleıbolshylary Azııa chempıonatynyń kúmis júldesin aldy

ATYRAÝ. 4 mamyr. Atyraýdyń múgedek sportshylarynan quralǵan voleıbolshylar komandasy Azııa chempıonatynyń kúmis júldesin ıelendi. Bul týraly «Múgedekter» sport klýbynyń dırektory Baýyrjan Tahaýov habarlady. Múgedek voleıbolshylar komandasy voleıboldy otyryp oınaıdy. Atyraýlyq múgedek sportshylardan jasaqtalǵan bul komanda elimizdiń namysyn halyqaralyq saıystarda birneshe jyl qatarynan abyroıly qorǵap keledi. Bir ereksheligi, voleıboldy otyryp oınaýdan el quramasy atyraýlyq múgedekterden jasaqtalǵan. Jaqynda Irannyń Meshhed qalasynda ótkizilgen Azııa chempıonatynda el namysyn taǵy abyroıly qorǵaǵan atalǵan komanda músheleri kúmis júldege ıe boldy. «Múgedekter» sport klýbynyń dırektory Baýyrjan Tahaýovtyń aıtýynsha, el quramasy Azııa chempıonatynda Mońǵolııa, Japonııa, Irak quramalarynan basym túsip, aqtyq básekede Iran eliniń komandasymen kezdesipti. Birneshe ret álemdik básekelerde top jarǵan ırandyq voleıbolshylarǵa ǵana ese jibergen atyraýlyq múgedek voleıbolshylar endi Polshada ótetin álem chempıonatyna beriletin úsh joldamanyń birin utyp aldy. Álem chempıonaty maýsym aıynda ótkizilmek. «Al kúzde Koreıada ótetin Rıo-de-Janeırodaǵy paraolımpıadalyq oıyndarǵa lısenzııa beretin saıystarǵa qatysamyz. Sol synnan paraolımpıadalyq oıyndarǵa qatysý joldamasyna ıe bolýdy kózdep otyrmyz»,–deıdi B.Tahaýov. Joldasbek Shópeǵul. Derekkóz: Atyraý «Múgedekter» sport qoǵamy. Foto: Atyraý «Múgedekter» sport qoǵamy.