Bas júlde qostanaılyq ánshige buıyrdy

Qostanaıda HII «Zolotoı mıkrofon» halyqaralyq balalar án baıqaýy aıaqtaldy. Bul sharanyń jyl ótken saıy­n qanaty qataıyp, aıasy ke­ńeıip keledi. Bıyl oǵan 60-tan astam jas ánshi qatysty. Eń jas ánshi tórt jasar Mádına Qabjálel baıqaýǵa Torǵaıdan kelip qatysty. Baıqaýdyń maqsaty máreden kóriný bolsa kerek. Úshinshi oryndy Astana qalasynan kelgen Egor Krıvenko, alma­tylyq Raýan Joldasova, Aqtaýdyń «BıS» dýeti, qostanaılyq Ardaq Erdáýlet jáne Reseıdiń Chelıabi qala­synan kelgen Elızaveta Grek bólisti. Ekinshi oryndy almatylyq jas ánshi Aqnıet Súıindikova, qostanaılyq Nurılá Qoqanbekova, «Baı­terek» toby, Belarýsten kelgen Vladıslav Starchenko aldy. Birinshi oryn aqtaýlyq Lýıza Nurqýatovaǵa, Alma­ty oblysynan kelgen Qanat Perızatqa, bolgarlyq An­tonına Dımı­trovaǵa jáne qostanaılyq Aı­dar Jazyqbaevqa bu­ıyr­­dy. Aıdardy halyq­ara­lyq baıqaýdyń uıym­das­tyrýshylary Belorýstegi án festıvaline shaqyrdy. Al án báıgesiniń bas júldesin Jandos Mýhammadı jeńip aldy. Ol oblystyń Lısakov qalasyndaǵy orta mekteptiń joǵary synybynda oqıdy. Oǵan oblys ákimi Nuraly Sádýaqasov 300 myń teńgeniń sertıfıkatyn tapsyrdy. – «Zolotoı mıkrofon» ha­lyqaralyq balalar án baı­qaýy deńgeıiniń óskeni sonsha, mundaǵy qazylar alqasy iriktegen jas ánshilerdiń dúnıe­júzindegi osyndaı kez kelgen baıqaýda baǵyn synatýǵa bolady. Munda da Eýropadan, Azııadan jas dúldúlder, jas bulbuldar keldi. Talant jasqa qaramaıdy eken. Ekinshiden, ár jaqtan kelgen balalar úsh kúnde dostasyp, keterde qımaı, jylap tarqasty. Muny kórýdiń ózi de ǵanıbet! Bir ókinishtisi, Ýkraına taraby jas talanttardy baıqaýǵa qa­tystyrmaı bıletterin qaıta ótkizdi, – deıdi baıqaýdy uıymdastyrýshylardyń biri Vıacheslav Avdeev. Belgili kompozıtor, qazy­lar alqasynyń tóraǵasy Keńes Dúısekeev baıqaýda qos­tanaılyqtarǵa Qostanaı ob­lysynyń ánuranyn tartý etti. Baıqaýdyń gala-kon­serti osy shyǵarmamen qorytyndylandy. Názıra JÁRIMBETOVA, «Egemen Qazaqstan». QOSTANAI.