Ádildiktiń týyn jelbiretý – mindet

Kezinde jasyl qala dep aty shyqqan Taldyqorǵannyń sánin kirgizip, saltanatyn asyrǵan ortalyq saıabaqtan qazaqtyń úsh bıi – Tóle, Qazybek, Áıteke babalarymyzdyń músinderi oryn alsa, dala danyshpandarynyń ádildigin Jetisý jerinde jalǵastyrýdy tól mindetine aınaldyrǵan Almaty oblystyq soty sýdıalaryna arnalǵan taǵy bir ǵımarat kúrdeli jóndeýden ótkizilip, paıdalanýǵa berildi. Halyqaralyq standartqa saı talap pen qajettiliktiń barlyǵy retimen oryn alǵan dep aýyz toltyra aıtýǵa turatyn osynaý ıgilikti Elbasynyń sarabdal saıasatynyń sot júıesindegi bir jemisi dep te baǵalady halyq. El bul ǵımarattan endi sotqa júgingen taraptarǵa ádil sheshim men úkim hám qaýly shyǵatynyna úmit artady. О́ıtkeni, damyǵan elderdiń barlyǵynda áýeli qyzmetkerdiń jumys isteýine jaǵdaı jasalady. Sosyn baryp talap qoıylatyny belgili. Bul órkenıetke umtylǵan elimizdiń de ustanymy bolyp otyr. Sonymen, dúıim jurttyń aldyna respýblıka Joǵarǵy Sotynyń qylmystyq ister jónindegi qadaǵalaýshy sot alqasynyń tóraǵasy Aqyltaı Qasymov, Almaty oblystyq sotynyń tóraǵasy Meırambek Taımerdenov shyǵyp Memleket basshysynyń sot júıesine basa nazar aýdaryp, álemniń damyǵan elderindegideı jasap otyrǵan jaǵdaıyna adal qyzmet etýmen jaýap beretindikterimen eldi sendire turyp, jergilikti atqarýshy bılikke Astanadan alyp kelgen Alǵys hattaryn oqyp, izgi tilekterin bildirdi. О́z kezeginde Almaty oblysynyń ákimi Ańsar Musahanov minbege kóterilip: «Elbasy Nursultan Nazarbaev sot bıliginiń bedelin arttyryp, mártebesin kóterýge erekshe mán berýde. Ata Zańymyzǵa sáıkes, sot júıesi derbes, táýelsiz bılik retinde memlekettik bıliktiń bir tarmaǵyna aınaldy. Sot júıesin qarjylyq, materıaldyq-tehnıkalyq jaǵynan qamtamasyz etýge nazar aýdarylǵandyǵynyń jarqyn dáleli retinde talapqa saı ǵımarattyń búgin ashylýy men qyzmettik kólikterdiń berilýin aıtýǵa bolady», dedi. Quqyqtyq saýattylyq, ádildik, arǵy-bergini eksheı alatyn zerdelilik syndy sýdıalarǵa aýadaı qajetti qundylyqtarǵa tula boıy tunyp turǵan Qazaqstan Respýblıkasy Sýdıalar odaǵynyń tóraǵasy Serik Baıbatyrov búgingi tarıhqa aınalǵan keshegi ómir ótkelderinen sýyrtpaqtaı syr tarta sóıledi. Shyny kerek, keńestik dáýirde sot júıesi men quqyq qorǵaý organdary qyzmetkerleri jupyny keńselerde otyryp, tozyǵy jetken avtokólikterdi kezektese minetin edi ǵoı. Al búgin she? Sondyqtan Táýelsizdiktiń qadirin bilip, baǵalaýmen shektelmeı sol Táýelsizdigimiz ǵumyrly bolýy úshin memleketimizdiń eń qymbat qazynasy – adam jáne adamnyń ómiri, quqyqtary men bostandyǵyn qorǵaýda zań sheńberinde eńbek etý paryz, mindet. Sóıtip, eńseli ǵımaratqa ıe bolǵan Almaty oblystyq sotynyń óńirdegi júıesine Joǵarǵy Sot – 10, al Almaty oblysynyń ákimi – 20 avtokólik tartý etti. Sondaı-aq, osy salada qajyrly eńbek etip kele jatqan birqatar sýdıalar men sot qyzmetkerleri vedomstvolyq nagradalarmen marapattaldy. Endigi mindet – ádildiktiń týyn jelbiretý. Nurbol ÁLDIBAEV, «Egemen Qazaqstan». TALDYQORǴAN. Sýretti túsirgen Jumabaı Musabekov.