«Qoqys pen ruqsat etilmegen polıgondar - bizdiń urpaqtyń ózekti máselesi. Qosymsha bıyl «Shell Qazaqstan» kompanııasynyń jáne Azamattyq bastamalardy qoldaý ortalyǵynyń qoldaýymen iske asyrylǵan «EcoBatys» jobasy aıasynda iske qosyldy. Kez kelgen Android qoldanýshysy «Eko-saqshy» qosymshasyn júkteı alady. Bul qosymshada ruqsat etilmegen polıgonǵa shaǵym túsirýge múmkindik beretin bólim bar. Eshbir ótinish nazardan tys qalmaıdy», dedi joba menedjeri Qasıet Balmolda.
Shaǵym túskennen keıin eriktiler ákimdiktermen birlesip, ruqsat etilmegen polıgondy joıatyn eko-jasaqty qurady.
Qasıet Balmoldanyń aıtýynsha, búgingi tańda Batys Qazaqstan oblysynyń Zachagansk jáne Derkól eldi mekenderinde ruqsat etilmegen 6 orynda qoqys úıindileri anyqtalyp, joıyldy. Olardyń joıylǵanyn qosymshanyń sıfrlyq kartasynan kórýge bolady.
«Eko-saqshy» qosymshasynyń arqasynda Batys Qazaqstan oblysy men Oral qalasynyń aýmaǵyndaǵy barlyq ruqsat etilmegen qoqys oryndary men jınaqtalǵan ekologııalyq zııannyń eń qaýipti obektileri joıylady dep kútilýde.
«Ruqsat etilmegen qoqys úıindileri - bul tek memlekettik organdar ǵana emes, aımaq turǵyndarynyń ózderi de sheshýi tıis másele. Qoqys - ınfeksııanyń oshaǵy. Beı-jaı qalý múmkin emes. Sondyqtan da men bul qosymshany júktep alyp, ony barlyq tanystaryma qoldanýǵa keńes beremin», dedi Oral qalasynyń turǵyny Elena Sharova.
Mobıldi qosymsha Play Market-te qoljetimdi. Ázirleýshilerdiń aıtýynsha, «Eko-saqshy» qosymshasy jaqyn arada AppStore-da qoljetimdi bolady.
