Tedros Adhanom Gebreıesýs búgin Qazaqstannyń jetekshi medısınalyq ýnıversıteti Asfendııarov atyndaǵy Qazaq ulttyq medısına ýnıversıtetine (QazUMÝ) barǵan.
Asfendııarov atyndaǵy QazUMÝ baspasóz qyzmeti málimetinshe, medısınalyq ýnıversıtette Densaýlyq saqtaý mınıstri Ajar Ǵınııat DDU basshysyn qarsy alǵan. DDU bas dırektory ýnıversıtettiń qurmetti qonaqtary kitabyna estelik jazba qaldyrdy. Akademık Sharmanov atyndaǵy Dańq zalynda Tedros Gebreıesýs qazaqstandyq ǵylym men medısınanyń jetekshi qaıratkerleri – QazUMÝ professorlarymen kezdesti, álemdegi epıdemıologııalyq jaǵdaıdyń damýy týraly suraqtarǵa jaýap berdi.
QazUMÝ rektory Marat Shoranov DDU basshysyna Qazaqstannyń jetekshi medısınalyq ýnıversıtetine kelgeni úshin alǵysyn bildirdi.
«Dúnıejúzilik densaýlyq saqtaý uıymynyń bas dırektory laýazymyna ekinshi merzimge saılanýyńyzben quttyqtaımyz. Pandemııanyń alǵashqy kúnderinen bastap DDU-ǵa múshe memleketterge qoldaý kórsetip keledi. Memleketimizdiń basshysy Qasym-Jomart Toqaev 2021 jyly sizben onlaın kezdesýinde jáne DDU assambleıasynda sóılegen sózinde pandemııa kezinde Qazaqstanǵa kórsetken kómegińizdi joǵary baǵalaıtynyn aıtqan. Ol kezde men densaýlyq saqtaý vıse-mınıstri bolyp jumys istedim, sizge jáne sizdiń ujymǵa alǵysymdy qabyl alyńyzdar», dedi QazUMÝ rektory.
Medısınalyq ýnıversıtettiń baspasóz qyzmeti málimetinshe, buǵan deıin DDU basshysy qala ákimi Erbolat Dosaevpen kezdesken.
