Ashylý saltanatyna QR Mádenıet jáne sport vıse-mınıstri Serik Jarasbaev, Nur-Sultan qalasynyń ákimi Altaı Kólginov, Azııa dzıýdo odaǵynyń prezıdenti Obaıd ál Anzı, Qazaqstan dzıýdo federasııasy prezıdentiniń mindetin atqarýshy Ashat Jitkeev jáne Qazaqstan Ulttyq Olımpıadalyq komıtetiniń bas dırektory Serik Qasqabasov qatysty.
Dzıýdodan erler men áıelder arasyndaǵy Azııa chempıonatyn Qazaqstan Respýblıkasynyń Mádenıet jáne sport vıse-mınıstri Serik Jarasbaev ashty.
«Qurmetti qaýym, sportshylar, sizderdi QR Mádenıet jáne sport mınıstrligi atynan Nur-Sultan qalasynda ótip jatqan dzıýdodan Azııa chempıonatynyń ashylý saltanatymen shyn júrekten quttyqtaımyn! 19 elden kelgen eń úzdik sportshylarǵa dúbirli dodada sáttilik tileımin! Eń myqtylar jeńiske jetsin», dedi vıse-mınıstr Serik Jarasbaev.
Qurlyqtyq birinshilikte tórt kún boıy tatamı sheberleri jeke jáne aralas-komandalyq jarystarda myqtylardy anyqtaıtyn bolady. Týrnırge Azııanyń 19 elinen kelgen 200-ge jýyq dzıýdoshy qatysyp jatyr.
Sondaı-aq jarystyń ashylý saltanatymen qala ákimi Altaı Seıdiruly jáne Azııa dzıýdo odaǵynyń prezıdenti Obaıd ál Anzı quttyqtady.
«Qaıyrly kún qurmetti sportshylar jáne jarys qonaqtary! Dzıýdodan erler men áıelder arasyndaǵy Azııa chempıonatynyń ashylý saltanatymen ózderińizdi quttyqtaımyn! Nur-Sultanǵa qosh keldińizder! Dzıýdodan Azııa chempıonaty elordamyzdyń tarıhynda birinshi ret ótip otyr. Dzıýdo jarysynyń ótýi sportshylarymyz úshin mańyzdy. О́ıtkeni sportshylardy shyńdaýǵa múmkindik beredi. Sportshylarǵa sáttilik tileımin! Al elimizdiń dzıýdoshylaryna joǵary jetistik tileı otyra, osy Azııa chempıonatynda elimizdiń týyn kóterip, ánuranyn shyrqatýlaryńyzǵa tilektespin! Eń myqtylar búgin jeńiske jetsin!», dedi Nur-Sultan qalasynyń ákimi Altaı Kólginov.
Baıraqty básekede el namysyn ulttyq qurama sapyndaǵy 18 sportshy qorǵaıdy. Olardyń arasynda Olımpıada chempıondary men álem birinshilikteriniń júldegerleri de baqtaryn synaıtyn bolady.
Ashylý saltanatynda Obaıd ál-Anzı iltıpat tanytyp, qurmetti qonaqtarǵa estelik syılyqtar tabystady.
Sonymen qatar Qazaqstan Ulttyq Olımpıadalyq komıtetiniń atynan Qazaqstandaǵy Olımpıadalyq qozǵalysqa orasan zor úles qosqany úshin Azııa dzıýdo odaǵynyń prezıdenti Obaıd ál-Anzı arnaıy tósbelgimen marapattaldy.
Aıta keteıik, IJF erejeleri boıynsha Azııa chempıonatynyń medal ıegerlerine olımpıadalyq reıtıngte upaılar qosylatyn bolady. Atap aıtqanda, jeńimpaz 700 upaı, kúmis júldeger – 490 jáne qola júlde – 350 upaı alady.
Dzıýdodan Azııa chempıonatyn kórermender «Qazsport» otandyq sport arnasynan tamashalaı alady.
