Qoǵam • 17 Tamyz, 2022

Baqyt mınıstrligi

237 ret kórsetildi

Baqyttyń formýlasy joq deımiz. Anyqtamasy da. Biraq báriniń baqytty bolǵysy keledi. Soǵan umtylady. Sony ańsaıdy. Demek baqyttyń uly uǵym bolǵany ǵoı.

Muny árkimniń ártúrli túsinetini de belgili. Qaraqan bastyń baqyty. Otbasy baqyty. Eldiń baqyty. Bári mańyzdy. Biraq sońǵysynyń salmaǵy báribir basym. Eldiń baqyty áldeqaıda aýqymdy. Oǵan ózgeniń bári syıady emes pe?!

Baqyt jaıly aıtyp otyrǵanymyz tegin emes. Bizdi mazalaıtyny bir suraq: Baqytty bolýdyń belgili bir ýaqyty bar ma? Abzaly qaısy: dál osy qazir baqytty bolý álde bárin bolashaqtyń enshisine qaldyrý?

Tutas álem aýmaly-tókpeli kezeńdi bas­tan ótkerip jatqanda bizdiń halyq tap búgin bolashaqty oılaýǵa beıildi emes-aý. Zamannyń surqynan sony sezip otyrǵan jaıymyz bar. Demek dál qazir, dál osy sátte baqytty kún keshý mańyzdy bolyp tur. Memleket basshysy Qasym-Jomart Toqaev ta bıylǵy Joldaýynda osyny ańǵartqandaı boldy.

«Men azamattarymyzdyń erteń emes, búgin baqytty ómir súrgenin qalaımyn. Eń bastysy – elimizdiń egemendigi! Shyn máninde, biz úshin Qazaqstannyń Táýelsizdigi bárinen qymbat. Osy turaqsyz, qubylmaly álemde Qazaqstanymyz bizden basqa eshkimge kerek emes. Sondyqtan maǵan elimniń amandyǵy men jerimniń tutastyǵynan asqan eshbir qundylyq joq. Meni eń aldymen, halqymnyń bolashaǵy qandaı bolatyny tolǵandyrady. Qyzmetime túrli adamdardyń beretin baǵasynan góri, memleketimizdi qorǵap qalý – men úshin asa mańyzdy mindet. Osy jolda jaýapkershiliktiń bárin moınyma alýǵa daıynmyn!», degen Prezıdent el baqyty jolynda eshteńeden taıynbaıtynyn baıqatty.

Ras, búgingi tańda halyq úshin máńgilik eldiń baqytynan góri osy sáttegi baqyttyń quny joǵary. Ataqty matematık ǵalym Asqar Jumadildaevtiń ult uıasy Ulytaýda ótken Ulttyq quryltaıda sóılegen sózinen de sony uǵynǵandaı boldyq.

«Evreılerde «Qudaıdyń atyn kóp aıta berme» degen támsil bar. О́zińe jaqyn, qasıetti uǵymdy kóp qaıtalaı berme degeni ǵoı. Mundaı dúnıe qazaqtarda da bar. Mysaly, kelinder qaıyn atasynyń atyn atamaıdy. Biraq qaıyn atasyna degen qurmetti izetpen jaqsylap kórsetedi. Biz «máńgilik» degen sózdi kóp aıtyp kettik. Máńgilik degen neshe jyl, 20 jyl ma? Álde 30 ba? Keshe qańtarda osy suraq kóldeneńinen qoıyldy. Kóshege shyqqan 20-30-dyń arasyndaǵy jastardyń 99 paıyzy – qazaq. Bári – Táýelsizdiktiń urpaqtary. Bári de rýhanı jańǵyrǵan jigitter. «Máńgilik elde turyp jatyrsyńdar» degendi júz ret estigen jas­tar. Máńgilik elde turyp jatsaq, nege mundaı jaǵdaı oryn aldy?! Osydan sabaq alýymyz kerek», degen-di áıgili ǵalym.

Shynynda da, ári-beriden keıin uranǵa aınalǵan «máńgilik» degen uǵymnyń astarynda «baqyt» degen maǵyna jatqany belgili. Baqytty elde mundaı ke­leń­­sizdik oryn almasa kerek-ti. Basynan baqyt qusy ushpaǵan el ǵana máńgilikke umtylady. Qańtar qasireti bizge máńgilik el­diń baqytyna umtylý ál-ázir mańyzdy emes ekenin uqtyrdy.

Tap qazir baqytty bolýdyń mánin tereń túsinse kerek, álemniń keıbir elderinde Baqyt mınıstrligi degen bólek bir vedomstvo da bar. Mınıstrlik degen – mekeme, basqarý organy. Demek bizdiń túsinigimizdegi qolǵa ustaýǵa kelmeıtin, kózge kórinbeıtin baqyt úshin arnaıy mınıstrlik qurýǵa bolady eken.

Mundaı vedomstvo alǵash Býtanda qurylǵan. Bul memlekette eldiń «ishki jalpy ónimi» degen uǵym joq. Onyń ornyna «ishki ulttyq baqyt» degen uǵym qoldanylady. Sonda eldiń ishki jalpy ónimi ulǵaıǵan saıyn jergilikti halyqtyń baqyty da arta túsedi. Tórtkúl dúnıege taratar tamasha tájirıbe dese de bolǵandaı.

Qazir Býtandaǵydaı Baqyt mınıstrligi Úndistan men Nıgerııada, Birikken Arab Ámirlikterinde de bar. Venesýela dál osyndaı vedomstvo qurýǵa talpynyp kórip edi, bastamasy sátsizdikke ushyraǵan sekildi. Biz ataǵan elder úshin halyqtyń óz ómirine qanaǵattanýy – ulttyq saıasattyń negizgi ustanymy. Adamdardyń qanshalyqty baqytty ekeni de únemi tekserilip otyrady. Túptep kelgende Jer sharynyń bárinde osylaı bolýǵa tıis.

Bizdińshe, Baqyt mınıstrligi barlyq elge kerek. Qazaqstanǵa da!

Baqytty bolaıyq! Búgin de, bolashaqta da!

Sońǵy jańalyqtar

Abaı óńirinde kóne qala tabyldy

Aımaqtar • Búgin, 16:54

Dollar baǵamy arzandady

Qarjy • Búgin, 16:15

Elordada AО́SShK sammıti ótedi

Qazaqstan • Búgin, 15:07

Aqtaýda jol boıynda kólik órtendi

Oqıǵa • Búgin, 12:31

Aldaǵy kúnderi elimizde kún sýytady

Aýa raıy • Búgin, 11:55

Irannyń ońtústiginde jer silkindi

Álem • Búgin, 11:22

Uqsas jańalyqtar