Investısııalyq jobanyń quny – shamamen 5 mlrd teńge. Qurylys jumystary eki kezeńnen turady. Jobaǵa sáıkes emdik sanatorııdi 2027 jylǵa deıin salý josparlanǵan. Onyń nátıjesinde kóldiń jaǵajaıy kórkeıtilip, sýǵa túsýge arnalǵan glempıngter salynady. Eń bastysy, balshyqpen emdeýdi kózdeıtin arnaıy basseınmen jaraqtalatyn saýyqtyrý keshenin iske qosý jobalanyp otyr. Sondaı-aq dál osy jerde eko-qonaqúıler, meıramhanalar jáne atpen serýendeýge arnalǵan ortalyqtyń jumysyn jolǵa qoıý kózdelýde.
«Keler jyly qurylys jumystarynyń birinshi kezeńi bastalady. Ekinshi kezeńde kúrdeli qurylys jumystaryn iske asyrý kózdelip otyr. Jobalaý jumystaryn bastap kettik. Qazir demalys aımaǵyna barsańyz, kóldiń mańyndaǵy beıberekettilikti baıqaısyz. Jer ýchaskesiniń qujaty rásimdelgen. Biz barlyǵyn eýropalyq sapaǵa sáıkes salǵymyz keledi. Biraq belgili bir qıyndyqtar bar – 11 gektar jer ınvestısııalyq jobaǵa kirgenimen, bul aýmaqta jobaǵa kedergi keltiretin jekemenshiktegi eki ýchaske bar. Bul oraıda ınvestısııalyq joba búkil jaǵalaýdy qamtý úshin teń quqyly aıyrbas jasaýǵa nıettimiz», dedi jobanyń jetekshisi Asqar Ijanov.
Áıtse de Abaı oblysynyń ákimi Nurlan Uranhaev teń quqyly aıyrbasty tek memlekettiń menshigindegi nysanmen ǵana júrgizýge bolatynyn jetkizdi. Budan basqa ınvestor jol men tushy sýdyń máselesi retteýdi qajet etetinin aıtty. О́ńir basshysynyń aıtýynsha, Besqaraǵaı aýdanynyń týrıstik áleýeti zor. Tek jol-kólik ınfraqurylymyn jańǵyrtyp, ınvestısııalyq klımatty jaqsartý qajet.
«Osydan 15-20 jyl buryn Mońǵolııaǵa saparlap qaıtqan edim. Atalǵan elde ınfraqurylym jaqsy damyǵan dep aıta almaımyn. Biraq soǵan qaramastan bul memleketke baratyn týrıst kóp. Rıýkzakty arqasyna asyp alyp, kórikti jerlerdi aralap júre beredi.
Alaıda qazir qajetti ınfraqurylym qarastyrylmasa, bul baǵytty damytý qıyn. Mysaly, Besqaraǵaıda ınvestorlar Shoshqaly kóliniń mańynan emdik shıpajaıdy salýdy josparlap otyr. Bul óz kezeginde ishki jáne syrtqy týrızmge qan júgirtedi dep oılaımyz. Álbette, qazir álemde ekologııalyq týrızmniń keń etek jaıǵanynan habardarmyz. Dese de ekotýrısterdi óńirimizge tartqymyz kelsek, olar aıaldap tynyǵa alatyndaı oryndardy jan-jaqty oılastyrýymyz kerek dep esepteımin», dedi N.Uranhaev.
Shoshqaly kóli óziniń emdik qasıetterimen erekshelenedi. Jyl saıyn kólge kórshiles Pavlodar oblysy men Reseıdiń Rýbsovsk, Barnaýl, Novosibir qalalarynan keletin týrıster úzilmeıdi. Alaıda kóldiń mańy zaman talabyna saı abattandyrylmaǵan. Jergilikti halyq osy másele qolǵa alynsa, jańa jumys oryndary ashylyp, aýdannyń kórkeıýine septigin tıgizer edi dep sanaıdy.
Abaı oblysy,
Besqaraǵaı aýdany
