BAQ ókilderiniń suraǵyna jaýap bergen Ǵylym jáne joǵary bilim mınıstrligi Joǵary jáne joǵary oqý ornynan keıingi bilim departamenti dırektorynyń orynbasary Erjan Ámirbekuly 1 qyrkúıekten bastap ulttyq ýnıversıtetterde oqý baǵasy kóteriletini týraly aqparatty joqqa shyǵardy.
«Birinshi qyrkúıekten bastap Ǵylym jáne joǵary bilim mınıstri Saıasat Nurbekulynyń málimedmesine saı, eshqandaı da oqý baǵasy kóterilmeıtinin málimdeımiz. Iаǵnı, baǵa byltyrǵy deńgeıde qalady. Osy nusqaýdy ýnıversıetterdiń bári qabyldady. Jekelegen ýnıversıtetterde memlekettegi belgilengen ınflıasııa deńgeıine baılanysty dıfferensıasııa boldy. Biraq ol belgilengen ınflıasııa deńgeıinen asqan joq. Munyń bári bir kúnde sheshile salatyn másele emes. Jalpy kez kelgen ýnıversıtette oqý aqysynyń kóterilýi nemese tómendeýi dırektorlar keńesiniń shemimimen, quryltaıshylardyń sheshimimen ǵana iske asady. Sondaı-aq, ol boıynsha bir aı nemese bir kúnde emes, birneshe aıda sheshim shyǵady. Sebebi olar naryqtaǵy jaǵdaıdy, stýdentterdiń tólem qabiletin, ýnıversıtettiń damý strategııasyn elep-eskere otyryp sheshim qabyldaýy kerek», dep túsindirdi vedomstvo ókili.
Onyń aıtýynsha, baǵa saıasaty erte kóktemde nemese jyldyń basynda qabyldanǵan sheshimder boıynsha aıqyndalady.
«Shilde aıynda mınıstr Saıasat Nurbek oqý aqysy kóterilmeıtini týraly málimdeme jasaǵan edi. Ol málimdeme tıisti ýnıversıetterdiń bárine naqty tapsyrma, nusqaý retinde aıtyldy. Sol kezden beri eshqandaı ýnıversıette oqý baǵasy ósken joq. Sizder surap otyrǵan ýnıversıtetterdiń bárinde jyldyń basynda baǵa dıfferensıasııasy bolǵan. Ýnıversıtet ózdiginen bir kúnde baǵany ózgertý týraly sheshim qabyldaı sala almaıdy. Sebebi ol stýdent pen bilim beretin mekeme arasynda kelisimshart jasalady. Odan keıin baǵa dıfferensıasııasy byltyry túsken nemese aldyńǵy jyly túsken stýdentterge ǵana baılanysty bolýy múmkin. Kelisimshartty qarasańyzdar, kóbinde oqý jyly bitkennen keıin kelesi oqý úrdisi bastalmas buryn memlekettegi ınflıasııa deńgeıinde baǵa dıfferensıasııasy bolýy múmkin degen tarmaq bolady. Tikeleı mınıstrliktiń qaraýyndaǵy ýnıversıetterde, sonyń ishinde ulttyq ýnıversıtetterde baǵa saıasaty ózgergen joq. Al jekelegen ýnıversıtetter baǵa saıasatyn naryqtaǵy jaǵdaıǵa sáıkes ulǵaıtyp jiberse, ony dırektorlar keńesiniń sheshimimen qaıta qaraýǵa múmkindik bar ekenin aıtqym keledi», dedi Erjan Ámirbekuly.
