Joǵarǵy palatanyń baspasóz qyzmetiniń habarlaýynsha, is-shara genderlik teńdikti qamtamasyz etý, áıelderdiń quqyqtary men múmkindikterin keńeıtý, sondaı-aq turaqty damý basymdyqtaryna qol jetkizý boıynsha Forýmǵa múshe elderdiń ózara is-qımylyn nyǵaıtý maqsatymen uıymdastyryldy. Sol arqyly ShYU memleketteriniń ózara is-qımylyn damytý kózdelgen.
Senator Lázzat Súleımen forýmda sóılegen sózinde Qazaqstannyń árqashan teń quqyqty jaqtaýshy bolǵanyn jáne solaı bola beretinin atap ótip, elde quqyqtyq jáne ınstıtýsıonaldyq negiz qalyptasqanyn, genderlik teńdik pen áıelderdiń quqyqtaryn qorǵaý salasynda belgili bir progreske qol jetkizilgenin aıtty.
Sonymen qatar depýtat bizdiń elimiz halyqaralyq standarttardy eskere otyryp, áıelder quqyǵyn qorǵaý jáne kemsitýshiliktiń aldyn alý máseleleri boıynsha ulttyq zańnamany jáne quqyqtyq tájirıbeni odan ári jetildirýdi jalǵastyra beretinin jetkizdi.
«Bizdiń qoǵamda áıelderdiń saıasatqa qatysýy jyl saıyn ómir sapasynyń jaqsarýyna jaǵymdy áser etip keledi. Bul jaǵdaı otbasy men balalardy qorǵaýdyń áleýmettik máselelerin sheshý baǵytyndaǵy saıası kún tártibiniń mańyzyn arttyrýǵa da yqpalyn tıgizýde. Sonyń nátıjesinde bul máselege qatysty daýlar azaıyp, kelisim kóbeıgenin atap ótken jón», dedi senator Lázzat Súleımen óz sózinde.
Forýmǵa qatysqan qazaqstandyq delegasııa quramynda Qazaqstan Prezıdenti Ákimshiligi Basshysynyń orynbasary Aıda Balaeva, Májilis depýtaty Álııa Saparova, COVID-19 qarsy qazaqstandyq vaksınanyń avtory Kúnsulý Zakarııa jáne Qazaqstannyń isker áıelder qaýymdastyǵynyń basshysy Raýshan Sársenbaeva boldy.
