Mınıstr jaǵymdy jańalyqpen Ulytaý oblysynyń turǵyndarymen kezdesýinde bólisti.
«Ulytaýdyń qazaq halqy úshin erekshe qasterli máni bar. Bul - ult besigi, bizdiń kópǵasyrlyq tarıhymyzdyń kóptegen tarıhı mańyzdy oqıǵalarynyń kýási. Ulytaýdyń mańyzdy oqıǵalar men jetistikterdiń ortalyǵyna aınalǵany qýantady. Sondyqtan dál osy jerde óner ordasy, ult uıasy Ulytaý tórinde, UMAI ulttyq syılyǵynyń bastalǵany týraly habarlaǵym keledi», dedi Dáýren Abaev óz sózinde.
Syılyq Qazaqstannyń shyǵarmashylyq ujymdary men jekelegen oryndaýshylaryna kelesi nomınasııalar boıynsha beriledi: teatr óneri; mýzykalyq-oryndaýshylyq óner; horeografııa óneri; beıneleý jáne sándik-qoldanbaly óner.
«Teatr óneri» baǵyty boıynsha «Opera óneri» - «Operadaǵy erler partııasyn úzdik oryndaý» jáne «Operadaǵy áıelder partııasyn úzdik oryndaý» syılyǵynyń jeńimpazdary 2 mln teńgeden alady. «Akterlik sheberlik» - 2 mln teńgeden 2 syılyq – «Úzdik er adam róli» jáne «Úzdik áıel adam róli». Sondaı-aq «Úzdik rejıssýra» jáne «Spektakldiń úzdik kórkem bezendirilýi» nomınasııalarynyń jeńimpazy 2 mln teńge alady. Sonymen qatar «Úzdik mýzykalyq-dramalyq spektakl» nomınasııasy boıynsha jeńimpaz 10 mln teńge alady.
«Mýzykalyq-oryndaýshylyq óner» - 2 mln teńgeden 3 aqshalaı syılyq – «Úzdik dástúrli oryndaýshy» (án aıtý), «Úzdik dástúrli oryndaýshy» (ınstrýmentalıst), «Úzdik mýzykalyq ansambl» (klassıkalyq/halyqtyq).
«Horeografııalyq óner» - 5 aqshalaı syılyq. «Úzdik bı ujymy» «Balettegi úzdik oryndaýshy» (2 syılyq) jáne «Úzdik horeograf» 2 mln teńgeden, al «Úzdik balet spektakli» 10 mln teńge alady.
«Beıneleý jáne sándik-qoldanbaly óner». Jeńimpazdar «Sándik-qoldanbaly ónerdiń úzdik týyndysy», «Keskindemeshiniń úzdik jumysy/grafıka», «Zamanaýı ónerdegi úzdik joba» nomınasııalary boıynsha marapattalady.
Aıta ketsek, «Úzdik balalar spektakli úshin» arnaıy syılyq taǵaıyndalady. Júlde 2 mln teńgeni quraıdy.
Konkýrstyq irikteýdi júrgizý jáne syılyq laýreattaryn aıqyndaý úshin tórt nomınasııanyń árqaısysynda 3 táýelsiz sarapshy jáne 12 adamnan turatyn saraptama komıssııasy jumys isteıdi. О́tinimder 2022 jyldyń 9 jeltoqsanyna deıin qabyldanady.
