«Árbir aýdannyń ózine tán kúrdeli ári sheshilýi tıis mańyzdy problemalary bar. Máselen Baıqońyr aýdanynyń Kúltegin kóshesinde joǵary voltty elektr berý jelisi (EBJ) ornalasqan. Bul másele 26 jyl boıy sheshimin tappaǵan. Aýdan turǵyndarymen kezdestik. Úıler kezeń-kezeńimen buzylatyn bolady. Eń aldymen elektr berý jelisi janynda ornalasqan Kúltegin, Asan qaıǵy, Syrdarııa, Lermontov kóshelerindegi úılerge basa mán beriledi. Osyǵan uqsas jumys aldaǵy ýaqytta irgeles aýmaqta da júrgiziledi. Alaıda bul bir kúndik nemese bir jyldyq jumys emes», dep jazdy ákim áleýmettik jelidegi paraqshasynda.
Altaı Kólginovtyń aıtýynsha, joba ortasha eseppen alǵanda 3 jyldan 5 jylǵa deıin sozylady.
«Byltyr elektr berý jelisin shyǵarý boıynsha jobalyq-smetalyq qujattamany daıyndaýdy qolǵa aldyq, qazir ol saraptamadan ótip jatyr. Al bıyl kúzde aýqymdy jobany iske asyrýǵa kirisemiz. Birinshi kezekte, joldardyń jáne ınjenerlik jelilerdiń qurylysy josparlanǵan ýchaskelerdegi úıler, sol sııaqty elektr berý jelisi astyndaǵy úıler buzylady. Buǵan qosa buzylatyn úılerdiń qunyn belgileý, olardy satyp alý jáne buzý jumystary júrgiziledi», dep jazdy qala basshysy.
Ákim Asan qaıǵy kóshesinde qosymsha elektr qýaty qosylǵannan keıin Kúltegin kóshesindegi elektr jelisi demontajdalatynyn jetkizdi.
«Bas josparda egjeı-tegjeıli josparlaý jobasyn ázirledik. Jeke sektordyń ornyna áleýmettik nysandar, turǵyn úı kesheni, qoǵamdyq keńistikter boı kóteredi. Asan qaıǵy kóshesiniń ózinde 200-den astam úı ornalasqan. Munda biz Ýálıhanov kóshesine parallel, ınjenerlik jelileri tolyq segiz jolaqty jol salýdy josparlap otyrmyz. Mine osydan keıin shaǵynaýdan ınvestorlar úshin de tartymdy bolmaq. Osylaısha, bıyldan bastap Kúltegin, Asan qaıǵy, Syrdarııa jáne t.b. kóshelerdegi úılerdi kezeń-kezeńimen buzýdy bastaımyz», delingen habarlamada.
