Prezıdent Balalar jylynda, Bilim kúninde jarııalanǵan Joldaýynda mektepke deıingi bilim berý júıesine aıryqsha kóńil bólip, mektepke deıingi tárbıe jumysy basty nazarda bolýy kerek ekenin aıtty. Biz «Balapan» baǵdarlamasy arqyly 3 pen 6 jastaǵy balalardy balabaqshamen 100 paıyz qamtı aldyq. Osyndaı kórsetkishke memleket-jekemenshik áriptestik negizinde qol jetkizdik. Biraq Memleket basshysy másele retinde kótergendeı, ekiden alty jasqa deıingi balalardyń jartysynan kóbi ǵana balabaqshaǵa barady. Sózsiz, mundaı olqylyqqa jol berýge bolmaıdy. Sol sebepti de Qasym-Jomart Kemeluly balalardy balabaqshamen qamtamasyz etý máselesin túpkilikti sheshýdi tapsyrdy. Memlekettiń múddesi bárimizge ortaq mindetke aınalady. Bul rette bizdiń «Qarlyǵash» balabaqshasy memlekettik saıasatpen úndestikte jumys istep otyr dep aıta alamyn, óıtkeni biz balalardy 2 jastan bastap qabyldaımyz. Árıne, el kóleminde osy máseleni sheshý úshin kásipkerlik tarapynan da janashyrlyq pen qoldaý qajet.
Kez kelgen salanyń damýy ondaǵy kadrlardyń kásibıligine tikeleı táýeldi. Balalardy 2 jastan bastap tolyǵymen mektepke deıingi bilimmen qamtamasyz etip, balabaqshalardy kóptep ashýǵa qol jetkizermiz. Degenmen salaǵa bilikti kadrlar tartpaıynsha júıeni laıyqty jetildirý qıynǵa soǵady. Máseleniń osyndaı ekinshi jaǵyn da eskergen Memleket basshysy osy jolǵy Joldaýynda tárbıeshilerdiń áleýmettik mártebesin arttyryp, jalaqysyn kóbeıtý keregin, osy saladaǵy mamandarǵa qoıylatyn naqty talaptar bekitilýge tıis ekenin aıtyp, olardyń jumys júktemesin de birtindep azaıtqan jón bolatynyn jetkizdi. Bizdiń balabaqsha bıyl Oqý-aǵartý mınıstrligi qolǵa alǵan «Eki tárbıeshi» qanatqaqty jobasyn approbasııadan ótkizýge atsalysty. Bul joba Prezıdenttiń joǵaryda aıtqan talaptaryn nátıjeli oryndaýǵa múmkindik beredi. Sebebi osy joba engizilse, bir topta 2 tárbıeshi kúni boıy jumys isteıdi. Mundaı júıe tárbıeshilerdiń jumys júktemesin azaıtady ári toptaǵy ár balaǵa kóbirek kóńil bólýge jaǵdaı jasaıdy. Al tárbıeshilerdiń áleýmettik mártebesi artyp, jalaqysy ósse, kásibı kadrlar kóptep tartylady. Osyndaı júıeli jumystyń nátıjesinde ǵana mektepke deıingi tárbıe men oqytý sapasy artady.
Beıbitgúl QAZAQPAEVA,
Prezıdent Is Basqarmasy Medısınalyq ortalyǵyna qarasty «Qarlyǵash» balabaqshasynyń dırektory
