Aıtýly kúı merekesi aldymen kúı atasynyń eńseli eskertkishine gúl shoǵyn qoıýmen bastaldy. Odan keıin «Kúı anasy» qoǵamdyq qorynyń tóraǵasy, qoǵam qaıratkeri Tólegen Qýanyshev sóz alyp, mádenı is-sharanyń mańyzyna toqtaldy.
– Biz búginge deıin áıgili kúıshi Dına Nurpeıisovanyń astanadaǵy eskertkishi janynda úsh Kúı jármeńkesin ótkizdik. Al bıylǵy tórtinshi kúı merekesin «Kúı anasy» qoǵamdyq qorynyń janynan qurylǵan aqsaqaldar alqasynyń sheshimimen Qurmanǵazy babamyzdyń eskertkishi janynda ótkizýdi uıǵardyq. Kúı dese kez kelgen qazaq eleń ete qalady. Bir jaǵynan, qazirgi jastardy qur sózben tárbıeleý qıyn. Sondyqtan atadan balaǵa jalǵasyp kele jatqan ǵajaıyp kúı ónerimiz arqyly jas urpaqtyń boıyna otanshyldyq rýhty daryta bilsek deımin. Mysaly, búgingi is-sharaǵa qatysýǵa, tyńdaýǵa kelgen kóptegen jasty kórip, kóńilim tolyp otyr. Osynyń ózi alǵa qoıǵan maqsatymyzdyń az da bolsa oryndalǵany dep bilemin, – dedi ol.
Aıta keteıik, búginde respýblıkalyq «Kúı anasy» qoǵamdyq qory biraz ıgi isterge muryndyq bolyp júr. Osy qordyń bastamasymen tanymal sheberler jasaǵan 185 dombyra óner mektepterine tegin taratyldy. Sondaı-aq Tólegen Qýanyshev óz sózinde Dına Nurpeıisovanyń bas qaladaǵy eskertkishi janynan «Kúıshiler» alleıasyn ashyp, sol jerge belgi tas qoıyp, oǵan tól ónerimizdiń damýyna zor úles qosqan dańqty kúıshilerdiń esimin jazyp qoıýdy josparlap otyrǵanyn jetkizdi. Odan soń belgili kúıshi, óner zertteýshisi, Qazaqstannyń eńbek sińirgen qaıratkeri Aıtjan Toqtaǵan Qurmanǵazy babamyzdyń ómir joly men murasy týraly parasatty oı órbitti.
Qazaqtyń rýhyn kúımen terbegen jármeńkeni Turar Álipbaev, Anar Muzdahanova, Nurlan Bekenov sekildi aıtýly kúıshiler bastap, ony ári qaraı jas talantty dombyrashylar qostap, kúı atasynyń rýhty, otty, ekpindi kúılerimen elorda aspanyn kúmbirletti. Is-shara barysynda ulttyq dástúrimizdiń tamasha úlgileri de umyt qalmady. Mádenıet qaıratkeri, dırıjer Nurlan Bekenov qazaqy jón-jobamen Aslan esimdi jas balaǵa dombyra syılady.
Sonymen qatar mazmundy mereke kúıshilerdiń kúı tartysyna ulasyp, oǵan kórermender arasynan da azamattar qatysyp, Qurmanǵazy babamyz ben basqa da tarlan kúıshilerdiń týyndylaryn tógiltip, kúıge sýsap júrgen qaýymnyń qumaryn qandyrdy. Kúı tartysynda oza shapqan kúıshige úkili dombyra tabys etildi.
