Qart Torǵaı óńirinde «Sherter» dese eleń etpeıtin jan joq. Ásirese jasy kelgen úlken kisiler biregeı ujym, onda óner kórsetken ánshiler týraly tamsanyp aıtady. Alǵashqy qurylǵannan ansambl syrnaı, qamys syrnaı, shańqobyz, asataıaq, tuıaqtas, qobyz sekildi halqymyzdyń kóne mýzykalyq aspaptaryn qaıta jańǵyrtýdy murat tutty. Árıne, ansambl ataýyna ıe bolǵan kóne shekti mýzykalyq «Sherter» aspaby basty aspap sanaldy.
Negizinen, «Sherter» folklorlyq-etnografııalyq ansambliniń irgetasyn 1971 jyly «Torǵaı áýenderi» atty estradalyq ansamblin qurǵan ónerli jastar qalady. Alǵashqyda onyń negizgi quramyna – Qaıyrjan Maqanov, Qypshaq Qoıǵarın, Qazymgúl Bozanova, Aıjan Nastaeva sekildi daryndy óner ıeleri alyndy. Odan keıin óner ujymy Jaqsylyq Qazyqanov, Saparǵalı Qodarov, Toıǵan Izim, Shotpaı Joldasbekov, Saılaý Ordabaev, Otarkúl Muqatova, Ábjan Sársenbaev, Keńes Birmaǵambetova, Ǵalymjan Qurmanov, Darıǵa Qurmanova, Moldash Faızýllın, Tursynbek Álmaǵambetov, Jaqsygúl Bóltirikova, Meıramǵalı Jumabaev, Jarylqasyn Ábiltaev jáne t.b. talantty jastarmen tolyǵyp, ansambldiń arnasy keńeıip, repertýary ulttyq naqyshqa baı án-kúı, bı, terme jáne monolog, kórkem sóz oqý sekildi túrli janrlarmen jandana tústi. Bastapqy kezde óner ujymy oblystyń Amangeldi, Jangeldın, Esil, Jaqsy, Qıma, Jarqaıyń sekildi aýdandaryna gastroldik saparmen shyǵyp, jergilikti halyqtyń yqylasyna bólendi.
Belgili bıshi, pedagog, Qazaqstannyń eńbek sińirgen ártisi Toıǵan Izim «Sherterdi» halyq jaqsy kórgendigin aıtady.
«Qazirde folklorlyq ansamblder jeterlik, biraq olardan shyqqan bógde dybystar men metaldyń úni qulaq jarady. «Sherterde» ondaı artyq dybys bolǵan emes. Taza mýzykalyq aspaptardyń úni estiletin. О́nerpazdar urmaly aspaptaǵy yrǵaqty ustap, súıemeldep otyratyn. Ansambldiń repertýary da baı boldy. Ony О́zbekáli aǵanyń ózi qadaǵalady. Ásirese ol kisi halyq án-kúıi men jergilikti óńirge arnalǵan týyndylardy aıtýǵa mán berdi. Mysaly, Qazymgúl Bozanova «Aǵajan-Látıpa», «Arqalyqtyń aq tańy», «Qyz qýý» degen ánderdi shyrqaǵanda kórermender ornynan turyp ketetin. «Sherterde» alǵashynda Saparǵalı degen jigitten basqa mýzykant bolmady. Sonda da qarap qalǵan joqpyz. О́zaǵań Amangeldi aýdanynan qobyzshy Sapar Ábenov aǵamyzdy aldyrdy. Jangeldın aýdanynan Shotbaı Joldasbaevty taýyp alyp, oǵan konsert júrgizip, satırıkterdiń sketchin oqytty. Aýyldardy jıi aralaımyz. Ansambl quramyndaǵy jalǵyz bıshi bolǵandyqtan, bir konsertte sahnaǵa 8-9 ret shyǵamyn. El adamdary bizdi quraq ushyp qarsy alyp, jany qalmaı kútedi. Án-kúıimizdi uıyp tyńdaıdy. Osylaı «Sherterdiń» aty Torǵaıǵa ǵana emes, Qazaqstanǵa tanyldy» deıdi ol kisi ótken kúnderden syr shertip.
Jalpy, «Sherterdiń» dańqy Qazaqstanǵa ǵana emes, basqa da elderge keń tanymal bolýyna О́zbekáli Jánibekov aǵamyz zor úles qosty. Ol kisi ansambldiń repertýarynan bastap, ártisterdiń kıimine deıin mańyz berip, árbir repertýardy saraptap otyrdy. О́nerpazdar kóne mýzykalyq aspaptardy sheber meńgerip, onyń tarıhyn tereń bilý úshin belgili mýzykatanýshy Bolat Sybanovty shaqyryp, dáris ótkizdi. Tipti Máskeýden tanymal horeograf Olga Vsevolodskaıa-Galýshkevıchti arnaıy aldyryp, qazaq bı ónerin zerttep, ony damytýǵa jaǵdaı jasady.
1974 jyly sol kezdegi elimizdiń bas qalasy – Almatyda Torǵaı oblysynyń kúnderi ótip, sonyń aıasynda óner kórsetken «Sherter» ansamblin kórýge kelgen jurtshylyqtyń qarasy kóp bolyp, «Qazaqkonsert» zalynda ıne shanshar oryn bolmaǵan desedi. Sodan bastap arqaly ansambldiń aty shyǵyp, respýblıkanyń barlyq óńirin aralap, kórermenderiniń rızashylyǵyna bólendi. Budan bólek, Reseı, Úndistan, Iran, Polsha, Bolgarııa, Vetnam, Koreıa, Fılıppın, Japonııa sekildi shet memleketterge gastroldik saparmen baryp, solardyń sahnasynda halqymyzdyń kóne mýzykalyq aspaptarynyń únin jańǵyrtyp, ult ónerin asqaqtatty.
Bir sózben aıtqanda, ultymyzdyń uly perzenti, Halyq Qaharmany Nurǵısa Tilendıev kezinde «Sherterdiń» ónerine tánti bolyp, ony «Qazaqstandaǵy folkorlyq-etnografııalyq ansamblderdiń ákesi» dep baǵalapty. Qazaqtyń kóne mýzykalyq aspaptary arqyly ǵasyr únin jetkizip, dańqy biraz elge jaıylǵan biregeı óner ujymyna budan artyq baǵa da joq sekildi...
