Al Qazaqstan úshin ekeýi de mańyzdy. Ásirese, shalǵaı aımaqtar úshin sý, jol, gaz, ǵalamtor da kún tártibinde tur. Osy tusta búgingi Q.Toqaevtyń Joldaýynda da barlyq baǵyttaǵy ınfraqurylymdy damytýǵa nazar aýdaryldy. Atap aıtsaq, geosaıası turaqsyzdyq jaǵdaıynda Qazaqstan óziniń kólik dálizderin barynsha damytýy kerek, ásirese Kaspıı arqyly ótetin Transkaspıı halyqaralyq kólik dálizin damytyp, osy aımaqta qazirgi zamanǵa saı logıstıkalyq hab qurý mańyzdy. Bul qazirgi jaǵdaıda osy baǵytta eselep artqan júk kólemin ıgerýge yqpal etedi.
Jol salý – bul sheneýnikterdiń «tabys kózine» aınalmaýǵa tıis, jol qurylysynyń sapasyna baqylaýdy kúsheıtý kerek. «...avtojol qurylysyna, sonyń ishinde jergilikti joldardyń sapasyna basa mán berý kerek. Bıýdjetten qyrýar qarjy bólinse de, bul másele áli sheshimin tappaı otyr» dedi Prezıdent. Áleýmettik ınfraqurylymnyń ishinde medısınalyq jáne bilim berý mekemelerimen halyqty jetkilikti qamtamasyz etý aımaqtar, tipti qalalar úshin de ózekti. Joldaýda aıtylǵandaı «...650 eldi mekende emdeý mekemesi joq. Aldaǵy eki jylda bul aýyldarda medısınalyq jáne feldsherlik-akýsherlik bólimsheler salynyp, qajetti qural-jabdyqpen tolyq qamtamasyz etiledi. Ulttyq joba aıasynda 32 aýdandyq aýrýhana zamanǵa saı jańaryp, endi aýdanaralyq kópbeıindi mekemege aınalady. Onda ınsýltten emdeý ortalyqtary, hırýrgııa, jansaqtaý jáne ońaltý bólimderi ashylady».
Mektepke deıingi jáne bilim berý mekemeleriniń jetispeýshiligi – bul bolashaq eńbekke qabiletti ekonomıkalyq belsendi halyqtyń sapasynyń tómen bolýyna tikeleı áser etedi. Joldaýda aıtylǵan osy baǵyttaǵy jumystardy da keıinge ysyrýǵa bolmaıdy.
Sonymen qatar Joldaýda qala, turǵyn úı ınfraqurylymyn damytýǵa da naqty usynystar aıtylǵan. Osy tusta halyqtyq ekspertıza – áleýmettik baqylaýdy kúsheıtýdi usynamyn. Sebebi jyl saıyn Joldaýda keleli usynystar aıtylady. Al onyń oryndalý barysyn jaýapty tulǵalardy qyzmetten bosatýmen ǵana aqtaý azdyq etedi dep oılaımyn. Ǵylymı qaýymdastyq, qoǵamdyq uıymdar jáne halyq bolyp Prezıdentten bastaý alǵan ıdeıalardyń iske asyrylýyn qadaǵalaýymyz qajet.
Aısulý TURSYNBAIQYZY,
Ekonomıka ınstıtýty Zamanaýı zertteýler bóliminiń meńgerýshisi
