Jıynǵa qatysýshylar tarıhı mańyzdy qujattaǵy barlyq qazaqstandyq qoǵam aldynda turǵan naqty mindetterdi keńinen saralady. Otyrysta sóz alǵan akademık Dıhan Qamzabekuly: «Prezıdenttiń Joldaýy – el damýynyń negizgi qozǵaýshy kúshi, biz úshin jańa beles. Bul mańyzdy qujat memleketimizdiń keleshegin baǵdarlaıtyn, dúnıejúzilik básekelestikte iskerligin baǵamdaıtyn, negiz jáne ol Qazaqstannyń damýynyń jańa kókjıekterin belgileýmen qundy», dedi.
EUÝ «Saıasattaný» kafedrasynyń meńgerýshisi Baǵysh Ǵabdýllına Prezıdent Qasym-Jomart Toqaevtyń Qazaqstan halqyna arnaǵan Joldaýy bul eldiń bolashaǵyn aıqyndaıtyn tereń tarıhı qujat ekenin atap ótti. «Joldaýda adam kapıtalyna jaqsy mán berilgen. Biz buryn armandaǵan, biraq oryndalýy múmkin emesteı kóringen eldiń ulttyq baılyǵyn árbir otbasynyń paıdalanýy iske asady. Ulttyq qordaǵy kiristiń 50 paıyzy 18 jasqa deıingi balaladyń shotyna aýdarylady. Sonymen qatar pedagogıkalyq joǵary oqý oryndaryn akkredıtteýdiń jańa standarty qabyldanady jáne pedagogtiń quzyrettilik sheńberi ázirlenedi, ıaǵnı joǵary quzyretti pedagogter qalyptasady. Bul tapsyrmalar iske assa, onda elimizdegi bilim-ǵylymnyń odan ári damýynda úlken ózgerister bolatynyna senimdimin», dedi kafedra meńgerýshisi.
Al jastar uıymdarynyń ókilderi Joldaý elimizdegi jastardyń damýyna jáne bilim alýyna úlken serpin beretinin aıtty. Bul týraly «Qazaqstan Team» respýblıkalyq qoǵamdyq jastar birlestiginiń jetekshisi Oljas Súleımen: «Memleket jastarǵa jan-jaqty qoldaý kórsetip jatqany qýantady. Prezıdent Joldaýda eńbekpen qamtıtyn túrli sharalar arqyly kelesi jyly 100 myń jasqa jumys berý kerektigin, olardyń kásipkerlik bastamalaryn qoldap jáne jeńildetilgen tártippen jyldyq ósimi 2,5 paıyz bolatyn shaǵyn nesıe beriletinin aıtty. Táýelsizdigimizdi saqtap, memleketimizdi órkendetý jolynda Prezıdent aıqyndaǵan strategııalyq baǵytty árdaıym ustansaq, uly jetistikterdi keıingi urpaqqa úlgi etip jalǵastyrarymyz aqıqat. Bul – Qazaqstan Respýblıkasynyń árbir azamatynyń mindeti dep oılaımyn», dedi.
