Pavlodarlyqtar sońǵy eki táýliktiń ishinde Qostanaı oblysyna 55 tonnadan astam gýmanıtarlyq kómek jiberdi. Amanat partııasy óńirlik fılıalynyń málimetinshe, jastar gýmanıtarlyq kómek jınaýǵa jáne olardy toptastyrýǵa bar kúshterin salýda.
– Bizdiń fılıalda ornalasqan qabyldaý pýnktine gýmanıtarlyq kómekterin ákelip jatqan jurtta esep joq. Kóbi – qarapaıym turǵyndar. Adamdar munda kelip tegin kómek kórsetýge daıyn ekenderin, ne qajet bolatynyn suraıdy. Mysaly, biz turmystyq tehnıka satyp alýdy suraǵan edik, bireý sháınek, endi bireý mıkrotolqyndy peshterin qushaqtap jetti. Otandastarymyz tap bolǵan qıyn jaǵdaıǵa jaýapkershilikpen qarap, sál de bolsa jaqsylyǵyn tıgizgisi keledi. Bizdiń bárimiz úlken elde, bir shańyraq astynda ómir súrip jatyrmyz. Osyndaı qıyn sátte uıysqan jerlesterimizdiń belsendiligi qýandyrdy, – dep atap ótti saıası uıymnyń Pavlodar oblystyq fılıalynyń atqarýshy hatshysy Ilıa Terenchenko.
Qabyldaý pýnktterinde gýmanıtarlyq kómek jınaý bir mezetke toqtaǵan emes. Belsendiler alǵashqy kezekte qurylys materıaldaryn, balalarǵa arnalǵan keńse taýarlaryn jáne turmystyq tehnıkany qabyldaýǵa den qoıýda. Burnaǵy kúni azyq-túlik, turmystyq tehnıka jóneltildi. «Qostanaı oblysynyń shtaby bizge qurylys materıaldaryn, mektep jáne keńse taýarlaryn jınaý týraly ótinish bildirdi. Jergilikti qurylys dúkenderi qoldaý kórsetip jatyr. «12 mesıasev» qurylys dúkeni qurǵaq qospalar, qysh plıtkalar berdi, jańa lınoleým oramyn ákeldi. Bul rette kómekti aqshalaı jınaý mindeti qoıylǵan joq, tek demeýshilerden jetkizýshi kólik qyzmetterine aqy tóleýdi ótindik. Búgin biz kem degende eki júk kóligin jiberýdi josparlap otyrmyz. Kóptiń járdemi tolastar emes, aǵylyp kelip jatyr. Jaqyn arada aýdandardan qosymsha gýmanıtarlyq kómek keledi», – deıdi Ilıa Terenchenko.
Atqarýshy hatshy oblystyq, qalalyq, aýdandyq máslıhattar depýtattarynyń da erekshe belsendiligin atap ótti. Jeksenbiden bastap halyq qalaýlylary azyq-túlik, kıim-keshek pen tehnıkany jınaýǵa belsene kirisken. Partııalyqtar kómektesýge sheshim qabyldaǵan barlyq pavlodarlyqtarǵa alǵys bildirdi.
Pavlodar oblysy
