Kóshi-qon saıasatynyń aldaǵy 5 jylǵa arnalǵan jańa tujyrymdamasy sheńberinde ishki kóshi-qondy yntalandyrýǵa baǵyttalǵan birqatar shara kózdeledi. Atap aıtqanda, eldiń basqa oblystarynda negizdelgen transfert jáne qoldanystaǵy bıznes-jobalardy keńeıtý arqyly jumys oryndaryn qura otyryp, azamattardyń soltústik jáne ortalyq óńirlerge retteletin qonys aýdarýyn uıymdastyrý tetigi iske qosylady.
Atalǵan baǵyt sheńberinde:
- árbir qabyldaýshy oblysta jer resýrstarymen, ınjenerlik, kólik-logıstıkalyq jáne áleýmettik ınfraqurylymdarmen qamtamasyz etýdi eskere otyryp, qonys aýdarýdy yntalandyrýdyń arnaıy óńirlik baǵdarlamasyn ázirleý kózdeledi. Sondaı-aq baǵdarlamalarda jumys kúshiniń tapshylyǵyn sezinetin ekonomıkanyń basym sektorlary aıqyndalady;
- jumys oryndaryn qurý boıynsha zor áleýeti bar tıisti bıznes-ıdeıalar konkýrsy arqyly soltústik jáne ortalyq óńirler úshin úzdik 100 bıznes-jobanyń keısin qalyptastyrý máselesi pysyqtalady;
- Jambyl oblysynyń oń tájirıbesin eskere otyryp, ortalyq jáne soltústik óńirlerde óndiriske jáne tehnıkamen qamtamasyz etýge jeńildetilgen nesıeler arqyly aýyl sharýashylyǵy kooperasııalaryn qurý jáne keńeıtý kózdeledi;
- jumys berýshi jumysqa ornalasý faktisin rastaǵan jaǵdaıda, qonys aýdarýshylar úshin jańa jerdegi turǵyn úı qunynyń 50%-y mólsherinde (beriletin turǵyn úıdiń ornyna) qarjylyq kómek alý quqyǵyn kýálandyratyn utqyrlyq sertıfıkattaryn engizý josparlanýda. Bul soma turǵyn úı salýǵa nemese satyp alýǵa, sondaı-aq Otbasy bankine bastapqy jarnany engizýge baǵyttalýy múmkin.
Vedomstvo ókilderi habarlaǵandaı, Memleket basshysynyń tapsyrmasyn júzege asyrý maqsatynda jańa Tujyrymdama aıasynda tarıhı Otanynda qandastardy qabyldaý jáne jaıǵastyrý saıasaty da qaıta qaralady.
«Atap aıtqanda, qujattardy qabyldaý kezeńinde qandastyń keletin jerin aıqyndaý tetigin engizý jáne osy óńirde turaqty turýdyń belgili bir merziminen keıin azamattyq bere otyryp, eńbek kúshi tapshy óńirlerge kóshýdi retteý men yntalandyrý jóninde sharalar qabyldaý kózdeledi», delingen habarlamada.
Aıta ketsek, bul tásil Germanııa, Reseı jáne Izraıl elderindegi otandastardyń jergilikti qoǵamǵa ıntegrasııalaný prosesterin retteý jáne ulttyq ekonomıkanyń qajettilikterin eskere otyryp, olardyń áleýetin paıdalaný úshin qoldanylady.
Sondaı-aq tarıhı Otanymen baılanysty nyǵaıtý maqsatynda joǵary deńgeıdegi mamandar nemese óz elderinde tabysty bıznes-keısterdi iske asyrǵan jáne olardy Qazaqstanda masshtabtaýǵa nıet bildirgen etnıkalyq qazaqtarǵa arnalǵan Qazaq kartasyn engizý usynylady.
Atalǵan kartanyń ıesi saıası quqyqtardy qospaǵanda, turý quqyǵymen birdeı bolatyn elge jeńildetilgen kirý quqyǵyn, sonymen qatar bıznes ashý, jyljymaıtyn múlikke jáne basqa múlikke ıelik etý, qarjylyq operasııalardy júrgizý quqyǵyna ıe bolady.
