Besinshi synyptyń ózinde úlken qala Máskeýdi kórgen ol sol sátin, keremet óner týyndylaryn kórgendegi qýanyshyn bylaı baıandaıdy: «1979 jyly ákem meni Máskeýge alyp bardy. Tretıakov galerııasyna aparatyn boldy. Mýzeıge kirdik, ondaǵy kartınalardy kórip, kózim shyǵyp kete jazdady. Ol kezde aýyl balasy uzasa keı kartınalardy kitaptardan kóretin shyǵar, al «tiri» sýretterdi kórgende, ózimdi umyttym. Solardyń ishinde Ivanov deıtin orys sýretshisiniń «Isa paıǵambardyń halyqqa kórinýi» deıtin týyndysy bar edi, ol bul sýretin 24 jyl salypty». О́nerge, ásirese kórkemsýret salýǵa degen qulshynys, ańsar áne sol kezde shyndap oıandy.
Onyń «Baqyt» atty kartınasyn tynysh ómirdiń, jaıbaraqat kóńil kúıdiń týyndysy der edik. Qyzyl kerishti taýdyń balaǵynda qamsyz jaıylyp júrgen eki at baqyttyń sımvoly retinde beınelengen. Bul týyndyda taý óz ornynda, al basyndaǵy munar óz beınesinde, tipti etektegi qos jylqy da óz kúıinde tur. Sheber qolmen salynǵan kartına bir qaraǵanda syryn bere qoımaıtyndaı. Al úńilip, tereńirek kóz salsańyz, bárin aıtyp turǵan sııaqty. Mundaǵy taý beınesi – tabıǵattyń, kerish – keń dalanyń, al at ómir tynysyn astarlaǵanyn ańdaý kerek. Sıqyrly álemge toly sýret óneriniń jan dúnıesin túsiný úshin de oǵan oı kózimen qaraǵan jón.
Peızaj janrynda jıi qalam terbeıtin sýretshi Jambyl Nátbaevtyń týyndylarynyń kóbi tabıǵatpen etene baılanysty. San qyryna tereń boılasań Tabıǵat ananyń ózi úlken sýretker emes pe?! Al odan alý da, oǵan berý de úlken oıdyń, syrshyl júrektiń jumysy. Qylqalam ıegeriniń «Asaýlar. Saıram asýy» atty kartınasy da qazaqy ómirdiń qalpyn kenep betinde sóılep beredi. Asaý, oıhoı, asaýlar! Keń dalanyń tósinde oıqastaǵan, jelden júırik, qustan ushqyr dala jylqylary. Endi olardyń beınesin alaqandaı aq matanyń betine salý qıynnyń qıyny bolmaq. Al sýretshi Nátbaev buǵan da sheberligin paıdalanypty. Bul týyndyda da taý, aspan, bult jáne jylqy bar. Osy tórt uǵym ol úshin tym qasterli ekenin kartınalar arqyly sezine alamyz. Taý eteginde turǵan kıizúı atalǵan týyndynyń kórkin ashqandaı. Tirshiliktiń qaınap jatqan kúıi, ómir aǵysy bári-bári óz deńgeıinde syr shertkenin jasyrmaımyz.
Sýretshiniń budan basqa týyndylary da «men tabıǵat týralymyn» dep aıqaılap aıtyp turady. Munyń sebebi Jambyl Nátbaev bala jasynan aýyl tirligin, mańǵaz dala, asaý jylqylar men aq shańqan kıizúılerdi, meıirli aýyl adamdaryn kórip óskendiginde.
Qarshadaıynan kókeıine jıǵan qundylyqtar eseıgende kórkemsýret bolyp oıyna oralǵany shyndyq. Taýdaı asqaq rýh, bulttaı appaq peıil, daladaı keń kóńil, jylqydaı júırik qııal Jambyl Nátbaevtyń shyǵarmashylyq álemin odan ári bıiktete tústi. Ol úshin sýret – dala, dala – sýrettiń ózi.
