Serik Jumanǵarın Jambyl oblysynyń kásiporyndaryn aralady

Jumys sapary aıasynda Serik Jumanǵarın fermerlermen kezdesip, aýyl sharýashylyǵy ónimderin óndirýdiń ózekti máselelerin pysyqtady.

Máselen, 20 myń qus ósiretin 12 fermasy bar «ECO-CHICKEN» ÁKK jylyna 200-210 tonna taýyq etin óndiredi. Munyń bárin 12 adam qamtamasyz etedi. Búginde kásiporyn shaǵyn qus fermalaryn salý jobasyn ázirlep, kooperatıvke biriktirdi. Árbir shaǵyn ferma 1600 broılerge eseptelgen jáne jylyna 3,8 mln teńgeden taza paıda alýǵa múmkindik beredi.

Fermerlerdiń aıtýynsha, bıyl qazaqstandyq pııazdyń tórtten úsh bóligi ósiriletin Jambyl oblysynda osy daqyldyń ónimi oıdaǵydaı bolady dep kútilýde. «Samǵaý» sharýa qojalyǵy 4500 tonna pııaz jınaýdy josparlap otyr, bul ótken jylmen salystyrǵanda jarty tonnaǵa kóp. Aýyl sharýashylyǵy jerleriniń alańy 470 gektardan asady. Munda 12 adam jumyspen qamtylǵan. 

Kezdesý barysynda Serik Jumanǵarın Úkimet agrarlyq óndirýshilerdi qoldaý úshin engizip jatqan jańa tásilder týraly aıtyp berdi. Qolda bar aınalym qarajaty sheńberinde negizgi áleýmettik mańyzy bar azyq-túlik ónimderin, atap aıtqanda kókónister, sút ónimderi, kúrish, un, áleýmettik nan, jumyrtqa, qaraqumyq, tuz, sıyr eti, taýyq eti, kúnbaǵys maıy jáne qant óndirýshilerdi qarjylandyrý shemalary qaıta qaralyp jatyr.

«Samǵaý» sharýa qojalyǵynyń basshysy Evgenıı Trýbnıkov ónimder baǵasyn turaqtandyrýdyń negizgi máselesi aınalym qarajatynyń jetispeýshiligi ekenin aıtty. 

Saýda jáne ıntegrasııa mınıstri  Serik Jumanǵarın ónimdi Qazaqstannyń batys óńirine kókónis qoımalarynda saqtaý jáne batys oblystardyń naryqtarynda ótkizý úshin jetkizý múmkindigin qarastyrýdy usyndy.

«Biz Qazaqstannyń batys óńirine pııaz jetkizý shemasyn ázirleýge jáne osy oblystarda pııazdy qystyń sońynda jáne kóktemde saqtap, satý úshin aınalym qarajatyn bólýge kómektesýge daıynbyz. Al siz óz tarapyńyzdan baǵany turaqtandyrý kereksiz, sondyqtan maýsymaralyq kezeńde ol 150 teńge emes, aıtarlyqtaı tómen bolyp, kúrt qymbattamaýy tıis», dedi Serik Jumanǵarın. 

Bul máseleni Saýda jáne ıntegrasııa mınıstrliginiń Saýda komıteti qarastyrady.

Sonymen qatar turǵyndar sút baǵasyna, qural-saımandar baǵasynyń ósýine qatysty jáne taǵy basqa suraqtar qoıdy.

Issapar barysynda Serik Jumanǵarın jasyl jelek pen balyq ósirýge mamandanǵan Greenwill jylyjaıyna baryp, jumysymen tanysty. Ońtústik Koreıanyń biregeı tehnologııasy tyńaıtqysh retinde balyq qaldyqtary qoldanylatyn organıkalyq ónim, kók shóp ósirýge múmkindik beredi.

Sapar sońynda vıse-premer et ónimderin óndirýmen jáne qaıta óńdeýmen aınalysatyn jáne 20-dan astam adamdy jumyspen qamtamasyz etip otyrǵan «Pervomaıskıe delıkatesy» JShS kásipornynyń jumysymen de tanysty.