Gennadıı Golovkın Las-Vegastaǵy jekpe-jegi aldynda Tengrinews tilshisine suhbat bergen. Ol meksıkalyq Saýl «Kanelo» Alvareske jaýap berip, tórtinshi jekpe-jek ótkizilýi múmkin ekenin aıtqan.
«Kanelomen» bolǵan sońǵy jekpe-jekten keıin tórt jyl ótkeni málim. Golovkınniń aıtýynsha, sol ýaqyt ishinde onyń kásibı mansaby ǵana emes, barsha álem ózgerdi.
«Osy tórt jyl ishinde kóp nárse boldy. Álemde pandemııa bastalyp, kóbi aýyryp, jaqyndarynan aıyryldy. Shynynda da qıyn ýaqyt boldy. Bizdiń jekpe-jegimizdi jarııalaǵan kezde «bunyń da ýaqyty jetken ǵoı, sirá» dep oıladym», deıdi sportshy.
Osy tusta, Saýl Alvarestiń ózi bul jekpe-jektiń astarynda «jeke másele» jatqanyn birneshe ret aıtqan edi. Qazaqstandyq boksshy osy sózge qatysty óz pikirin bildirdi.
«Onyń ózi úshin bul «jeke másele» shyǵar. Syrttan kórip otyrǵanymdaı, bul DAZN-daǵy sońǵy jekpe-jek. Endi, tórt jyldan keıin, Alvarestiń «men ony nokaýtqa jiberemin», «men onyń mansabyn aıaqtaımyn» degen qurǵaq áńgimeleri de paıda bolady. Ol meniń mansabymdy qalaı aıaqtaıdy? Ol meniń mansabymdy bastaıtyn nemese aıaqtaıtyn kim? Meniń oıymsha, bunyń barlyǵy ózin joǵarylatý úshin aıtylatyn bos sóz. Osyndaı málimdeme jasaý úshin onyń jasy da jaǵdaıy da áli jetpegen. Eger bul jeke nárse bolsa, ol birden sheshiletin edi», dedi Golovkın.
Suhbat barysynda jýrnalıst sportshydan «Kanelomen» úshinshi jekpe-jekke nege keliskenin surady.
«Barlyq boksshylardyń trılogııa ótkizýge múmkindigi bola bermeıdi. Bul jerde tek bir qaǵıdatty túsiný kerek: ne boksta qalasyń, ne bokstan ketesiń. 40 jasqa qaraǵan shaǵymda áli de kúsh-jigerimdi saqtap, suranysqa ıe bolǵanyma qýanyshtymyn. Sharshy alańǵa taǵy shyǵamyn dep sheshtim», dedi boksshy.
Gennadıı Golovkın óz qarsylasyn, onyń kúresý stıli men minezin jaqsy tanyp úlgergenin aıtyp, aldaǵy kezdesý qalaı ótetinine boljam jasady.
«Biz bir-birimizdi óte jaqsy bilemiz. Ekeýimiz úshin de bul óte qıyn kúres ekenin túsinemiz. Aldyńǵy eki jekpe-jek - bul tarıh. Olar keremet, kórnekti boldy, meniń oıymsha, olardyń maǵynasyn tómendetýge bolmaıdy. Degenmen, trılogııa - bul múldem basqa kúres. Bul este qalarlyq sát bolady dep úmittenemin», dedi ol.
Jaqynda «Kanelo» Golovkındi tórtinshi jekpe-jekke shaqyrýy múmkin degen aqparat tarady. Alaıda Golovkınniń ózi aldaǵy trılogııa ol úshin DAZN-de sońǵy bolýy múmkin ekenin joqqa shyǵarmaıdy.
«Sen suranysqa ıe bolsań ǵana boksta qalasyń. Meniń boksta áli de oryndalmaǵan josparlarym bar. Eger trılogııa barysynda ekeýimiz de teń túsip, jeńimpaz anyqtalmasa, tórtinshi kezdesýdi nege ótkizbeske? Biraq bul múldem basqa jaǵdaılarda bolady. Men buǵan qatysqym keledi, ıá. Biraq meniń orta salmaqtaǵy úsh chempıondyq belbeýim bar ekenin umytpańyzdar», dep qorytyndylady G.Golovkın.
