Jıyndy partııa tóraǵasy Azamathan Ámirtaev ashyp, referendýmnyń basty nátıjesine toqtaldy. Onyń aıtýynsha, «Baıtaq» partııasy Astanadan bastap eń shalǵaı óńirlik bólimshelerge deıin jańa Konstıtýsııany biraýyzdan qoldap daýys bergen. Bul – partııa músheleriniń ortaq ustanymy men el bolashaǵyna degen jaýapkershiliginiń aıqyn kórinisi.
«AMANAT» partııasynda referendým barysynda júrgizilgen qoǵamdyq baqylaý jumysy qorytyndylandy
«Baıtaq» – ekologııany jaı uran emes, naqty saıası baǵdarlama retinde ustanǵan partııa. Sondyqtan qorshaǵan ortany qorǵaýdy alǵash ret konstıtýsııalyq qaǵıdat ári ár azamattyń mindeti retinde bekitken jańa Konstıtýsııanyń qabyldanýy partııa úshin sanaly ári birtutas sheshim boldy.
Partııa tóraǵasy Azamathan Ámirtaev óz sózinde jańa memlekettik merekeniń mańyzdylyǵyna da toqtaldy.
«Endi 15 naýryz – referendým ótken kún Qazaqstan Respýblıkasynyń Konstıtýsııa kúni bolyp jarııalandy. Buǵan deıin 30 tamyzda atalyp kelgen mereke tarıh betinde qaldy. Bul – tereń sımvoldyq máni bar sheshim. Jańa Konstıtýsııa muraǵattyń tynysh bólmelerinde emes, búkil halyq kelip óz tańdaýyn jasaǵan kúni dúnıege keldi. Bul – el bolyp birge qalyptastyrǵan mereke», dedi ol.
Sóz sońynda partııa tóraǵasy jańa kezeńniń jaýapkershiligin atap ótti.
«Konstıtýsııa elimizdiń damýyna berik quqyqtyq irgetas qalady. Endigi mindet – sol negizdi naqty zańnamamen tolyqtyryp, ony ómirde júzege asyratyn pármendi tetikter qalyptastyrý», dedi Azamathan Ámirtaev Saıası keńes otyrysynyń qorytyndysynda.
Jıyn barysynda referendým aldyndaǵy kezeńde atqarylǵan jumystardyń qorytyndysy shyǵaryldy. Daýys berýge daıyndyq kezinde partııa elimizdiń barlyq óńirinde 500-den astam kezdesý, pikirtalas jáne aqparattyq-túsindirý is-sharalaryn uıymdastyrdy. Onlaın baılanysqa shyqqan óńirlik fılıal basshylary jergilikti jerlerde partııa músheleriniń daýys berý prosesine belsendi qatysqany jóninde baıandady. Talqylaý qorytyndysy boıynsha partııa aldaǵy kezeńdegi jumys basymdyqtaryn aıqyndady. Atap aıtqanda, jańa Konstıtýsııada bekitilgen ekologııalyq normalardy naqtylaıtyn zań jobalaryn ázirleý jáne qoǵamdyq baqylaýdy kúsheıtý negizgi baǵyttardyń biri retinde belgilendi.
Táýelsiz baqylaýshylar: Bıýlletenderdi sýretke túsirip, ınternetke jarııalaǵandar boldy
