Foto: freepik.com
Dexerto portalynyń málimetinshe, neırojeli tek keńes berýmen shektelmeı, mámileniń basynan aıaǵyna deıin rıeltordyń mindetin atqarǵan. ChatGPT naryqtaǵy derekterge súıene otyryp baǵa belgileý strategııasyn ázirlegen, jarnama mátinderin jazǵan, marketıng pen habarlama taratýdy uıymdastyrǵan. Sonymen qatar yqtımal satyp alýshylarmen hat almasyp, tipti satyp alý-satý kelisimshartynyń bastapqy nusqasyn da daıyndaǵan.
Mámileniń basty nátıjesi – jyldamdyq pen únem. AQSh-ta úı satý ádette birneshe aptadan birneshe aıǵa deıin sozylýy múmkin, al bul jaǵdaıda jyljymaıtyn múlik 5 kúnde satylǵan. Eń mańyzdysy – satýshy rıeltor qyzmetinen bas tartyp, ádette 5-6% bolatyn komıssııalyq tólemnen qutylǵan. AQSh-taǵy úılerdiń ortasha baǵasy birneshe júz myń dollardy quraıtynyn eskersek, bul ondaǵan myń dollardy únemdeýge múmkindik beredi.
Sarapshylardyń pikirinshe, bul jaǵdaı generatıvti jasandy ıntellektiniń tek kómekshi quraldan tolyqqandy mámile qatysýshysyna aınalyp kele jatqanyn kórsetedi. Degenmen mamandar quqyqtyq máselelerge erekshe nazar aýdarý kerektigin eskertedi.
Zańgerler qujattardy sońǵy tekserýden ótkizý úshin advokat nemese brokerdiń kómegine júginýge keńes beredi. Bul usynys sharttaryndaǵy qatelikterdiń, aqparatty tolyq ashpaý táýekeliniń jáne menshik quqyǵyn rásimdeý kezindegi olqylyqtardyń aldyn alýǵa múmkindik beredi.
Soǵan qaramastan, bul oqıǵa PropTech – jyljymaıtyn múlik salasyndaǵy tehnologııalyq sheshimderdiń jańa múmkindikterin kórsetetin mańyzdy mysalǵa aınaldy. Sarapshylar bolashaqta JI turǵyn úıdi baǵalaý, jarnama mátinderin avtomatty túrde ázirleý jáne kelisimshart daıyndaý sııaqty qyzmetterdi keńinen atqarady dep boljap otyr.
Dárigerler JI kómegimen ınsýlt pen onkologııalyq aýrýlardy erte anyqtap jatyr
