Baǵdat Baısadyqov elordanyń tynys-tirshiligin qamtamasyz etetin nysandardy jańa jylytý maýsymyna daıyndaý boıynsha josparly jumys júrgizilip jatqanyn málimdedi.
«Bilim berý jáne densaýlyq saqtaý obektilerin daıyndaý aıaqtalý satysynda. Olar boıynsha jumystardy 23 qyrkúıekke deıin aıaqtaý josparlanýda. Turǵyn úı qory boıynsha daıyndyq 85%-dy quraıdy. Jalpy alǵanda, 2999 úıdiń 2557-si daıyn», dedi Baǵdat Baısadyqov.
Biraq brıfıngte jylý naqty qaı kúni beriletini aıtylǵan joq.
Aıta ketsek, elordada jylý bes táýlik ishinde syrtqy aýanyń ortasha táýliktik temperatýrasy +10 gradýs jáne odan tómen bolǵan kezde beriledi. Tıisti sheshimdi qalalyq ákimdik qabyldaıdy.
Sońǵy eki jylda Nur-Sultandaǵy jylytý maýsymy qyrkúıek aıynyń sońynda bastalǵan edi.
Halyqty kómirmen qamtamasyz etý týraly aıta kele, spıker qalada 14 satý orny bar ekenin, onda segiz satýshy kompanııa jumys istep jatqanyn habarlady.
