Jalpy, bul joba ERG (Eýrazııalyq Top) quramyndaǵy «Qazhrom» TUK» AQ Aqsý ferroqorytpa zaýyty men «Pavlodar» ÁKK» AQ qoldaýymen júzege asyp otyrǵanyn aıtyp óteıik. Qoǵam belsendileri qazirgi ýaqytta jınalǵan úlgilerdi júıeleýge kiristi. Geologııalyq mýzeı Ertistiń Pavlodar óńiriniń tabıǵı baılyǵyn kópshilikke nasıhattap, aımaqtyń shıkizattyq áleýetin pash etpek. Bul arqyly óńir turǵyndary men syrttan keletin qonaqtar ólkemiz týraly tanymyn keńeıtip, kópshiliktiń ekologııalyq mádenıetin arttyrady dep kútilýde.
– Mýzeıge qoıylatyn úlgilerdi 2014 jyldan jınaı bastaǵan edik. Osy ýaqyt ishinde álemniń ár túkpirinen 150-ge jýyq jádigerdi jınap úlgerdik. Odan soń bizdiń óńir týraly tolyqqandy ekspozısııa uıymdastyrýdy maqsat ettik. Pavlodar oblysynda qosymsha ekspedısııa júrgizý kerek boldy. Aqsý ferroqorytpa zaýyty bizdiń bastamamyzdy qoldady, – dep atap ótti geografııa úıiniń dırektory Aleksandr Vervekın.
Birlestik músheleri josparlanǵan on ekspedısııanyń toǵyzyn ótkizdi. Aımaqtyń túrli ken oryndary zerttelip, halsedon psevdostalaktıtteri, kalsıtter, kvarsıtter, dala shpattary, múıizaldamysh, mys kógi, vezývıan-pıroksenıttik rodıngıtter, aǵash jáne múk opaldary, drýza jáne kvars krıstaldary jınaldy. Maı aýdanyndaǵy «Qalmaqqyrylǵannyń» granıtti alqaptarynan raýhtopaz ben flıýorıttiń hrýstal tárizdi ózeginiń jarqyn jáne qyzyqty úlgileri tabyldy. Arasynda lamprofır-porfırıt jáne dolerıt te bar. Osylaısha, bolashaq mýzeı jádigerleriniń jalpy sany qazirde úsh júzden asyp otyr.
Jańa mýzeı aldaǵy qarasha aıynda ashylady dep kútilýde. Aıtyp óteıik, geografııa úıinde buǵan deıin etnografııalyq mýzeı, qoǵamdyq geografııalyq kitaphana jáne «Jurbaı» jas ólketanýshylar klýby qurylǵan.
Pavlodar oblysy
