Kezdesý barysynda Qazaqstan men Dúnıejúzilik densaýlyq saqtaý uıymy arasyndaǵy joǵary áriptestiktiń mańyzy, sondaı-aq 30 jyldyq ózara qarym-qatynastardyń tabysty nátıjeleri atap ótildi.
Senat Tóraǵasynyń orynbasary DDU ókiline elimizdiń densaýlyq saqtaý salasyn damytý maqsatynda atqarylyp jatqan jumystar týraly aqparat berdi.
«Memleket basshysy Qasym-Jomart Toqaevtyń aıtýynsha, aldaǵy kezeńdegi eń mańyzdy mindetterdiń biri – ult densaýlyǵyn qamtamasyz etý. Sondyqtan elimizdegi medısınalyq ınfraqurylymdy jaqsartýǵa erekshe nazar aýdarylyp keledi. Kelesi jyldan bastap aýyl turǵyndarynyń saýlyǵyna baǵyttalǵan ulttyq jobany iske asyrý bastalady, onyń aıasynda 32 aýdandyq aýrýhana jańǵyrtylady, aýdanaralyq kóp salalyq mekemeler bolyp qaıta qurylady degen jospar bar. Al eki jyl ishinde 650 aýylda medısınalyq jáne feldsherlik-akýsherlik pýnktter salynyp, tolyq jabdyqtalady», dep atap ótti Tóraǵa orynbasary.
Áńgime barysynda taraptar halyqaralyq uıymdardyń qatysýymen óńiraralyq deńgeıde birlesken kúsh-jigerdi talap etetin Aral teńiziniń problemalyq máselelerin de ortaǵa saldy.
Tóraǵa orynbasary BUU Bas Assambleıasynyń 77-shi sessııasynda sóılegen sózinde Memleket basshysy Qasym-Jomart Toqaev qatysýshylardyń nazaryn Aral teńizi máselelerine aýdarǵanyn jáne barlyq múddeli taraptardy ekologııa jáne klımat problemalaryn sheshý jumystaryn jalǵastyrýǵa shaqyrǵanyn aıtty.
EQYU PA shilde sessııasy barysynda Qazaqstan men О́zbekstan Aral teńizin qutqarýǵa baılanysty jobalardy iske asyrýda donor bolýǵa shaqyra otyryp, Uıymǵa múshe memleketterge birlesken úndeý joldady.
«Kelesi jyly QR Parlamenti Senatynyń shaqyrýymen EQYU PA depýtattary apat aýqymyna kóz jetkizý jáne yntymaqtastyqtyń budan bylaıǵy baǵyttaryn belgileý úshin Aral óńirine barady. Qazaqstan Eýropalyq aımaqtyq bıýronyń kómegimen DDU eldik keńseleriniń Aral óńiri halqynyń densaýlyǵyna áser etetin faktorlardy zertteýge biryńǵaı tásildi ázirleý úshin kúsh-jiger men resýrstardy biriktirýge kómek kórsetýdi suraıdy», dedi Olga Perepechına.
DDU Eýropalyq óńirlik bıýrosynyń dırektory Hans Klýge Ornyqty damýdyń salaýatty ómir salty jáne kez kelgen jastaǵy barlyq adamdardyń ál-aýqatyna járdemdesý jónindegi jahandyq maqsatyna qol jetkizýdi qamtamasyz etý jónindegi QR Parlamenti Senatynyń jumysty qalyptastyrý jáne úılestirý bóligindegi qyzmetine joǵary baǵa berdi.
