Kollajdy jasaǵan Qonysbaı ShEJIMBAI, «EQ»
Ejelgi dos Esenbaıdyń úıine at basyn tiregenbiz. Bizden buryn da kelgen qonaqtar bar eken.
– Aýyzdaryńnyń salymy bar eken, dál keldińder, – dep qaýqyldap qaldy ol, – sirge móldiretip jatyrmyz.
Shańyraqqa sálem berip, ilgeri ozdyq. Ánsheıinde ádeıi izdep barsań taptyrmaıtyn aýyldyń aqsaqal-qarasaqaly osy úıge jınalypty. Ortalarynda dáý tabaq. Marqanyń maıly etin jep, sary qymyzdy sapyryp iship, máslıhat quryp otyr eken.
– Qalada ne jańalyq bar? – dedi Qonysbaı aqsaqal, – biz mine, elde tirshilik etip jatyrmyz. Jaǵdaı jaman emes, bıyl ylǵal mol boldy, shóp te jaqsy shyqty. Mynaý ońtústikten kelgen aǵaıynnyń izimen jaqsy dástúr jalǵasa keldi. О́zderi qandaı uıymshyl?! Bir-birine qolǵanat kómekterin aıamaıdy eken. Qamysaqtynyń boıyndaǵy qyrýar jerdi qolshalǵymen shaýyp aldy. Bizdiń jaq mundaı qol kómekti asar dep, olar úme dep ataıdy eken. Esebi, bir-birine qaraılasyp, aýqymdy isti birigip bitiretin shara úme atalsa kerek. О́zen jıegine úı tigip, as ázirledi. Al jigitter ózen ańǵaryndaǵy uıysyp bitken jońyshqany qolshalǵymen shaýyp aldy. Biz atamyzdan qalǵan shalǵyny baıaǵyda tehnıkaǵa senip laqtyryp tastasaq, bular áli ustap júr. Qolshalǵymen shapqan shóp qandaı tamasha, shań-tozańy bolmaıdy. Qystyń kúni jıdektiń ıisi ańqyp turady, tipti bar ǵoı, mal túgil óziń jegiń keledi.
Jolserigim Sabyrbektiń ańqasy keýip kelgen eken, dáý syrly aıaqqa quıylǵan, betinde maıy júzip júrgen qymyzdyń úsh kesesin simirip aldy. Qyp-qyzyl bolyp pisken baýyrsaqty sary maıǵa batyryp jegen saıyn álginiń tábetine qaradan qarap otyryp óziń de razy bolady ekensiń. Ar jaqqa el qonǵan soń kelgen sharýamyzdy tyndyryp, keri attanǵanbyz.
Kúzgi jol kúreńitip jatyr. Jolaýshyǵa oı serik, álden ýaqytta únsizdikti jolserigim buzǵan.
– Aǵa, osy álgi úı nege qonaq shaqyryp jatyr? – dep surady ol, – sirge móldireter dedi me?
– Kúzdiń kúni bıe aǵytar ýaqytta sońǵy qymyzǵa et jaqyn aǵaıyn-týysty, aýyldyń aqsaqaldaryn shaqyryp dám beredi. Onyń arǵy jaǵynda qolynda barymen bólise bilgen ultymyzdyń qonaqjaı qasıeti jatyr. Dám adamdardy birlikke shaqyrady, al birliktiń arǵy jaǵynda bereke bógip jatqan joq pa? – dedik biz.
Jolserigim qaıtyp ún qatqan joq. Ejelden bilemin ǵoı, qarny toısa boldy, qazaqtyń qaı kádesi bolsa da qolaıyna dóp keledi.
Kókshetaý
