Ortalyq Azııa elderi kásipodaqtary keńesi (OAEKK) músheleriniń biraýyzdan qabyldanǵan sheshimimen Qazaqstan Respýblıkasy Kásipodaqtar federasııasynyń tóraǵasy Satybaldy Dáýletalın osy uıymnyń Bas hatshysy bolyp saılandy.
Satybaldy Dáýletalın kórsetilgen senim úshin alǵysyn bildirip, Ortalyq Azııa aımaǵynda kásipodaq qozǵalysyn odan ári progressıvti damytý úshin eńbek etetinin basa aıtty.
«Bizdiń memleketterimizdiń halyqtarynyń tarıhı tamyry ortaq, baýyrlastyq jáne tatý kórshilik qatynastary bar. Ortalyq Azııa elderiniń kásipodaqtar keńesi Ortalyq Azııa aımaǵyndaǵy 15 mıllıonnan astam jumyskerdiń laıyqty eńbek standarttary men ádil jalaqyǵa qol jetkizý jolyndaǵy yntymaǵyn nyǵaıtýǵa jáne halyqaralyq kásipodaq yntymaqtastyǵyn nyǵaıtýǵa yqpal etýge nıetti. Biz birigip Keńes múshelerine ortaq maqsat – Eńbek adamynyń múddeleri men quqyqtaryn qorǵaýdy kózdep otyrmyz. Men óz tarapymnan Keńes bastamalaryn halyqaralyq kásipodaq qozǵalysynyń barlyq alańdarynda ilgeriletý úshin óz bilimim men tájirıbemdi jumsaımyn», dedi Satybaldy Dáýletalın.
Sondaı-aq, keńes músheleri – Ortalyq Azııa elderiniń ulttyq kásipodaq ortalyqtary kóshbasshylarynyń otyrysynda uıymǵa jańa músheler – Qyrǵyzstan Kásipodaqtar federasııasy men Mońǵolııa Kásipodaqtar konfederasııasynyń jibergen ótinishterine sáıkes múshelikke engizý týraly sheshim qabyldandy.
Keńestiń maqsaty – eńbekkerlerdiń áleýmettik-eńbek, kásiptik, ekonomıkalyq jáne ózge de zańdy quqyqtary men múddelerin, kásipodaqtardyń quqyqtary men kepildikterin qorǵaý boıynsha OAEKK músheleriniń is-áreketterin biriktirý.
