Memleketimizdegi saıası reformalardyń zańdy jalǵasy ispettes 2022 jyldyń 20 qarashasyna belgilengen el Prezıdentin kezekten tys saılaý – álemdik syn-qaterler aıasyndaǵy jańa tarıhymyz ben taǵdyrymyzdyń qaınaýynan týyndaǵan sheshim dep senimmen aıta alamyz.
Bul saıası júıeni tolyq serpiltýge baǵyttalǵan qadam bolmaq. Eldiń basshysy – alqalaǵan áleýmet múddesin oryndaýshy. Sondyqtan memlekettiń syn saǵatynda jaýapkershilikti óz moınyna alyp, eldiń burynǵy-keıingi qordalanǵan ózekti de ótkir máselelerin ońtaıly sheshýge jumylýy – mańyzdy baǵdar dep bilemiz.
Qazaqstannyń sońǵy aı men aptadaǵy saıası jańalyqtarynan habardar qaýym jahan órisine sebepshi úsh alyp elmen aradaǵy baılanysymyzdyń jańa kezeńin ańǵarsa kerek. Qytaı basshysy Sı Szınpın qazaq eline resmı sapary qarsańynda jarııalaǵan maqalasynda shekaralas eki memleket arasyndaǵy qarym-qatynastyń tarıhı tamyryn, búgingi jetistigin aıta kelip, jańǵyrýymyz ben qaýipsizdigimizdi barynsha qoldaıtynyn jetkizdi. Muny qudaıy kórshi aqysy ǵana emes, halyqaralyq saıası táýelsiz baǵa deýge negiz bar.
Jahandyq kúrdeli teketirestiń jýan ortasynda júrgen Reseı prezıdenti Vladımır Pýtın de Qazaqstandaǵy saıası reformalar men jańashyl izdenister TMD, ShYU aıasynda oń nátıje bergenine eleýli dálel keltirdi.
Baıyrǵy ata sózimizde «Tar talasyp tozar, keń keńesip ozar» degen danalyq bar. Álemde qyrǵı-qabaq áreket qaıta jandanǵanda, Eýrazııa ótindegi tarıhy tolǵamaly Qazaqstannyń ashyqtyq pen dostyq ustanymynan utylǵan alys-jaqyn kórshini kórmedik. Uly dalanyń bul amanaty áli talaı ýaqyt janymyzǵa jalaý, óremizge óris bolary sózsiz.
Memleket basshysy BUU Bas Assambleıasyna barǵan sapary kezinde AQSh-tyń Politico gazetine bergen suhbatynda: «Ulttyq oı-sanamyz keıingi jyldary bastan ótkergen tereń áleýmettik ózgeristerden, ekonomıkalyq jáne qaýipsizdik daǵdarysynan týyndaǵan, bárinen de góri biz áldeqaıda ádiletti, árbir azamatqa qyzmet etetin el qurýymyz kerek ekenin aıqyndaǵan túbegeıli ózgeris deńgeıine kóterildi dep sanaımyn», dep atap kórsetti.
Al BUU 77-sessııasynyń pikir almasý alańyndaǵy: «Qazaqstan Prezıdenti retindegi ustanymym – árbir azamat teń múmkindikterge ıe ári quqyǵy qorǵalǵan Ádiletti Qazaqstandy qurý. Meniń elimde ádildik saltanat qurýy kerek. Zań men tártip qoǵamymyzdyń negizi bolady. Bul joldyń eń mańyzdy bóligi – transformasııalyq saıası reformalar. Aldaǵy aılarda Qazaqstanda prezıdent jáne parlament saılaýy ótedi. Men Prezıdent ókilettigin jeti jyldyq bir merzimmen shekteýdi usyndym. Bul – Qazaqstanda demokratııany damytýdaǵy naǵyz serpilis», degen sózi Amerıka men álemniń jetekshi memleketterine el ustanymyn tanytýdyń órkenıetti joly edi.
Taıaýdaǵy Álemdik jáne dástúrli din kóshbasshylarynyń 7-sezine qatysqan iri rýhanı tulǵalar da Qazaqstandaǵy bereke-birliktiń, saıası transformasııanyń jańa kezeńine kózi jetip, kóńili sendi. Bul – elimizdiń zor abyroıy.
Iá, qazir qoǵamymyz jańarý úderisin bastan keship otyr. Bılik pen áleýmet údemeli, sapaly saıası qarym-qatynas deńgeıine bet túzedi. Munyń qos tarapqa da syn hám synaq ekeni túsinikti. Biz burynǵy negizgi ustanymnan kindigimizdi úzdik. Munyń táýekelmen birge qaıyry bar ekenin sezine bilgenimiz abzal. Ol qaıyrdyń ataýy – ádiletti memleket, birtutas ult, berekeli qoǵam.
Qarapaıym jurtshylyq, zııaly qaýym Qazaqstan jańarýynyń aqıqatyna sene bastady. «Igilik basy – yntymaq» dep osyndaıda aıtsa kerek.
Prezıdenttiń bir rettik jáne jeti jyldyq ókilettigi – qanaǵat pen is nátıjesin kórsetetin shama. Álem tájirıbesi men Qazaqstannyń qaýip-qaterdi eskerip baryp usynǵan joly – birin-biri teristemeıdi, qaıta jańa izdenispen tolyqtyrady. Halyq ishinde aıtylyp qalatyn «Ata zańǵa bitpeıtin túzetý» synyna bul ózgeris, bul jańa tájirıbe shydas beredi dep sanaımyz. О́ıtkeni oǵan kepil – halyq senimin alatyn, durysy el amanatyn arqalaıtyn Prezıdenttiń ózi bolmaq. Biz negizgi zańdyq-quqyqtyq qujattarymyzda «sýperprezıdenttikke jol berilmeıtinin» shegelep kórsettik. Bıik minberden onyń oryndalý tetigin de aıttyq.
Ult ustazy Ahmet Baıtursynuly: «О́tkendi qýǵandy qoıyp, osy kúıińdi jóndeýge jón izdeý kerek», dep jazyp edi. Dál búgin biz senimsizdik pen kúdikke jol bergen ýaqytty artqa tastap, senim men ádiletke ıek artýymyz qajet. Adamnyń adal nıetine qut qonady, qoǵamnyń baıypty baılamyna baq turaqtaıdy.
