Qala kúni qarsańynda óńirdiń ál-aýqatyn arttyratyn qurylys materıaldaryn shyǵaratyn zaýyttyń jumysy iske qosyldy. Mundaǵy jumysshynyń barlyǵy – jergilikti azamattar. Zaýyt shyǵaratyn gazblok – óńirge asa qajet qurylys materıaly. Endi turǵyndar baıaǵydaı alysqa sabylyp júrmeıdi.
«Bizdiń úshjyldyq josparymyzǵa sáıkes, qala boıynsha mıllıon sharshy metrden astam qurylys josparlanyp otyr. Sonymen qatar bul ónimdi basqa da oblysqa usynysqa bere alamyz. Osyndaı ıgi isti bastap, týǵan jerge týyn tigip jatqan jandarǵa rızashylyǵymyz sheksiz», dedi qala ákimi Áset Dúısebekuly.
Gazblok kirpishterin óndiretin qaladaǵy alǵashqy kásiporynda qazir 35 adam jumys isteýde. Zaýyt basshylyǵy bolashaqta qyzmetkerler sanyn 150-ge jetkizýdi josparlap otyr. Munda táýligine 100 tekshe metr kirpish shyǵarylady. Zaýyt ónimi otandyq jáne Reseı tehnologııasymen daıyndalady. Jeke kásiporynǵa memleket tarapynan jer ýchaskesi, ınjenerlik jeliler bólip, óndiristi jedel gazdandyrýǵa kómek kórsetildi.
«Zaýytta kirpishterdiń barlyq túrin shyǵaramyz. Jumysshylarǵa kúnine eki ýaqyt tamaq, jumys kıimi beriledi. Jumysshylardyń ortasha jalaqysy – 200-300 myń teńge. Osyndaı zaýytty ashýǵa kómektesken oblys, qala basshysyna alǵysymyz sheksiz. Biz munymen shektelip qalmaımyz, zaýyt ónimderine suranys kóbeıgen saıyn, jergilikti jumysshylardyń sanyn arttyramyz», dedi zaýyt dırektory Irına Han.
Qazirdiń ózinde zaýyt ónimine suranys kóp. О́ńirdegi qurylys kompanııalary zaýyt ónimine tapsyrys berip jatyr eken.
Zaýyttyń ashylýynan keıin kópshilik Oqýshylar saraıynda ótken «Baldáýren» shyǵarmashylyq balalar festıvaline bardy. Is-sharada 250-den astam baldyrǵan áýeletip án salyp, myń buralyp bı bılep, qolóner sheberligin kórsetti. «Baldáýren» festıvaliniń sońynda balalarǵa syılyqtar taratyldy. Qala kúnine oraı jergilikti aspazdar arnaıy «Taldyqorǵan» degen tort ázirlepti. Tortty qala ákimi kesip, jurshylyqty qala kúnimen quttyqtap, izgi tilegin bildirdi.
Qala basshysy «Jastar» saıabaǵy men sport saraıynyń janyna qoıylǵan kórmeni aralady. Munda óndiristik kásiporyndardyń taýarlary, «Kia» «JAK», «HavaI», «Hyundai», «Lada» markaly avtokólikteri, qolóner sheberleriniń buıymdary men fotogroftardyń týyndylary ornalasqan. Ár aýdannan kelgen ujym óz ónimderin tanystyrdy.
Osydan keıin fýtbol festıvali ótti. Oǵan 7-8 synyp oqýshylary arasynda 25 komanda qatysty. Balǵyn sportshylardyń festıvalin tamashalaýǵa barǵan qala ákimi oqýshylarǵa dop taratyp, jyly lebizin bildirdi.
Qala kúnine arnalǵan dúbirli dýman «Jastar» saıabaǵynda ótken merekelik konsertpen jalǵasty. Is-shara barysynda shahar basshysy Áset Masabaev jurtshylyqty merekemen quttyqtap, qalanyń damýy men órkendeýine eleýli úles qosqan Taldyqorǵan qalasyndaǵy oblystyq aýrýhananyń dırektory Anarbek Monǵolǵa, Múgedekterge arnalǵan oblystyq mamandandyrylǵan sport mektebiniń aǵa jattyqtyrýshysy Erbolat Imanqulovqa, «Aısulý» tigin fabrıkasynyń atqarýshy dırektory Jarylqasyn Bolatulyna, «Lider.kz» eriktiler uıymynyń jetekshisi Matveı Shvedıge «Taldyqorǵan qalasynyń qurmetti azamaty» ataǵyn tapsyrdy.
TALDYQORǴAN
