Kezdesý barysynda Memleket basshysyna Astanada álemniń 12 myqty shahmatshysynyń basyn qosqan FIDE Gran-prı áıelder serııasynyń birinshi kezeńiniń ótkizilýi týraly jan-jaqty aqparat berildi.
Qasym-Jomart Toqaev osyndaı deńgeıdegi bedeldi is-sharalardy ótkizý elimizdegi shahmat sportynyń damýyna eleýli úles qosatynyn atap ótti.
«Qazaqstanda shahmat keńinen tanymal, ásirese, balalar men jastar arasynda. Bizde 7 myńnan astam seksııa jumys isteıdi, degenmen bul kórsetkishti keminde eki ese arttyrýǵa tıispiz. Qazir shahmatpen 200 myńnan astam adam aınalysady. Qazaqstandyq shahmatshylar halyqaralyq jarystarda sátti óner kórsetip júr. Biz bul sportty qoldaýǵa basa mán beremiz. Shahmatty damytýdyń Jol kartasy ázirlendi. «Mekteptegi shahmat» aýqymdy jobasyn júzege asyrýdy josparlap otyrmyz», dedi Memleket basshysy kezdesý barysynda.
О́z kezeginde Arkadıı Dvorkovıch Qazaqstanda shahmatty jeke qoldaǵany jáne tanymal sportqa aınaldyrǵany úshin Qasym-Jomart Toqaevqa rızashylyǵyn bildirip, FIDE shahmatty mektep baǵdarlamasyna engizý jónindegi halyqaralyq tájirıbesin bólisýge daıyn ekenin jetkizdi.
Sonymen qatar olar Qazaqstan men FIDE arasyndaǵy uzaq merzimdi yntymaqtastyq máseleleri jóninde pikir almasyp, elimizde iri halyqaralyq týrnırler ótkizý perspektıvalaryn talqylady.
