Jıynda partııalyqtar aldaǵy prezıdent saılaýyna úmitker retinde JSDP elordalyq fılıalynyń basshysy Nurlan Áýesbaevtyń kandıdatýrasyn qoldady. Naqtyraq aıtsaq, partııa sezine qatysqan 49-delegattyń 48-i N.Áýesbaevtyń kandıdatýrasyn qoldaǵan.
«Sezd Nurlan Satybaldyuly Áýesbaevty Jalpyulttyq sosıal-demokratııalyq partııasynan prezıdenttikke kandıdat etip saılaý týraly sheshim qabyldady», dedi partııa tóraǵasy Ashat Rahymjanov.
Nurlan Áýesbaev 1957 jyly týǵan. Túrkistan oblysynyń týmasy, Astana turǵyny. Joǵary bilimi bar, M.Áýezov atyndaǵy Ońtústik Qazaqstan memlekettik ýnıversıtetin bitirgen, uzaq ýaqyt Jergilikti atqarýshy organdarda jaýapty laýazymdarda jumys istegen.
Partııa sezinde N.Áýesbaevtan bólek taǵy tórt adamnyń kandıdatýrasy talqyǵa túsken. Olardyń qatarynda, oppozısııalyq saıasatker Jasaral Qýanyshalın men burynǵy senator Ýálıhan Qaısarov ta bar. Alaıda sezd delegattary eki saıasatkerdiń de partııaǵa eshqandaı qatysy joq ekenin alǵa tartyp, kandıdatýralaryn qoldaýdan bas tartty. JSDP-nyń Pavlodar oblysyndaǵy bólimshesiniń tóraǵasy Ajar Saǵyndyqovanyń aıtýynsha, kezekten tys prezıdent saılaýy jarııalana salysymen bul adamdar áleýmettik jelidegi jeke paraqshalarynda málimdeme jasap, kez kelgen respýblıkalyq qoǵamdyq birlestikter men partııalardyń atynan kandıdatýralaryn usynýǵa daıyn ekenin málimdegen. «Alaıda saıası dodaǵa qaı partııanyń artynan, ne úshin túsetinin aıtqan joq», deıdi A.Saǵyndyqova.
Al sezde sóılegen sózinde prezıdenttikten úmitker N.Áýesbaev qoǵamdy ózgertý úshin eń aldymen ár adam memleket aldyndaǵy jaýapkershiligin sezinip, ózgeristi ózinen bastaýy kerek ekenin aıtty.
Aıta keteıik, Jalpyulttyq sosıal-demokratııalyq partııasy elimizde osy ýaqytqa deıin ótken saıası naýqandar kezinde mundaı belsendilik tanytpaǵan bolatyn. «Aldaǵy kezekten tys saılaýǵa qatysýǵa ne túrtki boldy?», «Bul saılaýdyń ereksheligi nede?» degen suraqtarǵa partııanyń belsendi múshesi Tazabek Sámbetbaı: «Buryn elimizde sýperprezıdenttik júıe bolǵanyn bárimiz bilemiz. Qazir Qazaqstanda shynaıy básekege az da bolsa jol ashyldy. Álemdegi san qubylǵan geosaıası jaǵdaıǵa bárimiz kýá bolyp otyrmyz. Osyndaı syndarly sátte elimizdiń mańyzdy saıası naýqanynan shet qalmaý qajet. Sebebi prezıdent saılaýy – tutas eldiń taǵdyryna jaýapty kezeń», dep jaýap berdi. Partııanyń Almaty qalalyq bólimshesiniń basshysy T.Sámbetbaıdyń aıtýynsha, qazir búkil qoǵam, Qazaqstan úlken ózgeristerdi basynan ótkerýde.
2007 jyly resmı tirkelgen Jalpyulttyq sosıal-demokratııalyq partııasy 2015 jáne 2019 jyly ótken prezıdent saılaýlaryna boıkot jarııalaǵan edi. Saıası uıym 2021 jyly ótken parlament saılaýyna da qatysqan joq.
