Baıqaýǵa Ortalyq Azııa men Ázerbaıjannan 360-tan astam jumys usynyldy. Is-sharanyń qorytyndysy boıynsha Qazaqstan «Jyl memleketi» atandy. Bul ataq halyqaralyq qazylar alqasynyń daýys berý nátıjeleri boıynsha eń kóp upaı jınaǵan elge beriledi. Ázerbaıjannyń Endorphin kompanııasy «Jyldyń eń úzdik agenttigi» dep tanyldy. Qazaqstan atynan qatysqandarǵa – 50, О́zbekstanǵa – 24, Ázerbaıjanǵa 13 marapat tapsyryldy.
– Red Jolbors-ta biz árqashan salanyń eń qyzyqty jáne ózekti máselelerin kóteremiz. Jarnamalyq agenttikterdiń ókilderi jáne aımaǵymyzdyń marketologterine tájirıbemizdi bólisýge úzdik sarapshylardy jınaýǵa tyrysamyz. Bıylǵy baıqaýdyń spıkerleri men qazylar alqasy jarnama jáne marketıng salasyndaǵy eń bedeldi marapattardyń ıegerleri boldy, – dedi Red Jolbors negizin qalaýshy Sabına Reıngold.
Dáristerdiń, sondaı-aq paneldik pikirtalastardyń spıkerleri iri jarnama agenttikteriniń, Eýropa, Ońtústik Koreıa, Grýzııa, Qazaqstan, Qyrǵyzstan, О́zbekstan, Reseı kompanııalarynyń ókilderi boldy. Olar ózderiniń tájirıbelerin áńgimelep, shyǵarmashylyq ıdeıalardy ázirleý, marketıng quraldarynyń tıimdiligi, brendterdiń ósý múmkindikteri, seriktestik qurý, sıfrlyq dızaınnan keıingi dızaın, marketıngtegi metaverster, TikTok-qa mıllıondaǵan aýdıtorııany tartý týraly aıtty. Sondaı-aq Red Jolbors-tyń 2022 jylǵy negizgi taqyryptarynyń biri ómir súrip jatqan ortany jaqsy jaqqa ózgertetin ESG jobalaryn qurý jáne damytý tóńireginde boldy.
Sonymen qatar is-sharada úsh túrli paneldik pikirtalas uıymdastyryldy. Olardyń biri Ortalyq Azııa elderinde kreatıvti ekonomıkany damytýǵa arnaldy. Oǵan Aqparat jáne qoǵamdyq damý vıse-mınıstri Aleksandr Danılov qatysty.
– Qazir Qazaqstan men onyń memlekettik organdary bıznes jáne qoǵammen ózara is-qımylǵa ashyq. Mańyzdy qoǵamdyq máselelerdi sheshý úshin biz shyǵarmashylyq salalardyń, kreatıvti ındýstrııa ókilderin tarta otyryp, ortaq kúsh salýymyz kerek. О́zara yntymaqtasý arqyly bizdiń odan ári damýymyzǵa úlken múmkindikter paıda bolady, – dep atap ótti A.Danılov.
Red Jolbors – shyǵarmashylyq, kommýnıkasııalyq jáne jarnama agenttikteriniń, óndiris jáne dızaın stýdııalarynyń ókilderi, marketologter, brend menedjerleri, PR mamandary, jarnama jáne marketıng salasynyń mamandary úshin jyldyń eń iri oqıǵalarynyń biri. Red Jolbors mıssııasy – shyǵarmashylyq ındýstrııa ókilderiniń kásibı qaýymdastyǵyn qurý jáne damytý. Festıval áý basta Qyrǵyzstanda quryldy, al 2018 jyldan bastap jyl saıyn Qazaqstanda ótedi.
