Aýdannyń kásipkerlik jáne aýyl sharýashylyǵy bóliminiń basshysy Dınara Dosanovanyń málimetinshe, kartop egistikteriniń 81 paıyzy jınalyp, gektarynan orta eseppen 330 sentner ónim túsýde. Qazirdiń ózinde 128,7 myń tonna kartop jınalǵan. Al kókónisterdiń 88 paıyzy alynyp úlgerdi. Sondaı-aq bıyl jergilikti sharýalar alǵashqy qar túskende 13 myń gektardan maıly daqyldardy orady.
– Bizdiń óńir sapaly kartop jáne kókónis túrlerimen tanymal. Kartop ósirýmen negizinen «Andas» ShQ, «Ashat» ShQ, «AgroCult» JShS, «Maıak» ShQ, «Zarıa» ShQ, «Rodnık» ShQ, «AgroSoıýz» FQ sııaqty iri sharýashylyqtar aınalysady. О́nimdilik ótken jyldyń deńgeıinde saqtalyp otyr. Sońǵy jyldary sýarmaly tanaptardyń úlesi artyp, búginde aýdan boıynsha 15 myń gektardy qurady. Sýarmaly jerlerde negizinen kartop pen kókónister, sondaı-aq jemshóp ósiriledi. Jıyn-terim naýqanyna óńir boıynsha 2 565 birlik aýylsharýashylyq tehnıkasy jumyldyryldy. Aýdanda eginshilikpen jalpy sany 158 sharýashylyq aınalysady. Negizi oraq kezeńinen kútilgen josparlar óz mejesine jetýde. Dıqandarymyz jetkilikti kólemde astyq pen kókónis, kartop jınaıdy, – deıdi bólim jetekshisi.
Aıtyp óteıik, bıyl «Pavlodar» ÁKK» AQ-nyń ıeligindegi turaqtandyrý qoryna atalǵan óńirdiń kókónis ósirýshileri jyldaǵydaı arzan baǵaǵa kartop pen kókónis túrlerin tapsyrady. Qysqy ýaqytqa saqtalatyn ónimder boıynsha qazirdiń ózinde «Andas» sharýa qojalyǵy 200 tonna sábiz ben 1 myń tonna kartop, al «Rodnık» sharýa qojalyǵy 50 tonna pııaz ben 50 tonna qyryqqabat jetkizýge memorandým jasasty.
Jalpy, bıyl Ertis ózeni boıyndaǵy fermerler qyryqqabat pen pııaz tanaptaryn keńeıtip, nátıjesinde óńirimiz kókónis túrlerimen barynsha qamtamasyz etiledi dep kútilýde. Jyl basynda oblys basshylyǵy jergilikti dúken sórelerin qysta ózimizdiń qyryqqabatpen qamtý týraly tapsyrma bergen. О́tken qys pen kóktem aılarynda ońtústikten jetkiziletin kókónistiń tym qymbat ekendigin turǵyndar birneshe márte másele etip kóterip, jergilikti sheneýnikter bul túıtkildi sheshýge ýáde etken edi.
Oblys ákiminiń orynbasary Meıram О́teshov bıyl shamamen 14 myń tonna qyryqqabat jınalatynyn, bul byltyrǵydan 48 paıyzǵa kóp ekenin, al pııaz 6 myń tonnadaı bolyp qalatynyn aıtady. Nátıjesinde, pııaz boıynsha jergilikti suranystyń 84 paıyzy, qyryqqabat boıynsha 50 paıyzy ótelmek.
Pavlodar aýdanynda jańadan kókónis saqtaý qoımalaryn salý úrdisi de jaqsy saqtalyp otyr. Oblystaǵy qoımalardyń úshten biri osy óńirge tıesili. Chernoıarka alqabyndaǵy sýarmaly jerlerdiń ónimi qysqy ýaqytqa saqtaýǵa jaramsyz bolǵandyqtan onda jınalyp jatqan kókónis pen kartop negizinen egis basynan kóterme baǵada satylyp ketedi.
Pavlodar oblysy
